AQShning Arkanzas shtatida bug‘u o‘zini yarador qilgan ovchini shoxlari bilan suzib o‘ldirib qo‘ydi, deb xabar beradi Fox4 News.
Ko‘ngilsiz hodisa Yelvill shahri yaqinida 24-oktabr kuni sodir bo‘lgan. 66 yoshli Tomas Aleksandr ov davomida bug‘uni otgan. Uning rostdan ham o‘lgan yoki o‘lmaganini bilish uchun hayvonning oldiga yaqinlashgan. Biroq shu vaqt bug‘u oyoqqa turib, erkakka shoxlari bilan jarohat yetkaza boshlagan.
Ovchi turmush o‘rtog‘iga qo‘ng‘iroq qilgan. Ayol tomonidan chaqirilgan qutqaruvchilar Tomasni shifoxonaga olib borgan, biroq uning hayotini saqlab qolishning imkoni bo‘lmagan.
Shtatning ovchilik va baliqchilik masalalari bo‘yicha komissiyasi erkak rostdan ham bug‘u shoxlari oqibatida yoki boshqa bir kasallik sababli vafot etgani aniq emasligini ta’kidlagan.
Shtat komissiyasining tavsiyasida “o‘ldirilgan” bug‘uga 30 daqiqagacha yaqinlashmaslik aytilgan. Hayvon shunchaki karaxt holatga tushib qolgan bo‘lishi mumkin.
Yarador bug‘u topilmagan.
Izoh (0)