Шавкат Мирзиёев Чилонзордаги «Ориент керамик» саноат корхонасига ташриф буюрди. Президент матбуот хизматининг хабар беришича, давлат раҳбари 2017 йилда Чилонзор туманига ташрифи чоғида ушбу корхона лойиҳасини маъқуллаган.
Шундан сўнг фойдаланилмаётган ерда замонавий бино қурилиб, хориждан керамика маҳсулотлари ва кафел ишлаб чиқарадиган ускуналар келтириб ўрнатилган.
Корхона 2019 йил июль ойида иш бошлаган. Унинг умумий қиймати қарийб 14 миллион доллар бўлиб, йилига 3,6 миллион квадрат метр керамик маҳсулотлар ишлаб чиқариш қувватига эга. Президент корхонанинг иш жараёни билан танишиб, маҳсулот турларини кўздан кечирди.
Қайд этилишича, маҳсулотлар деярли юз фоиз маҳаллий хом ашёдан тайёрланмоқда. Шу сабабли, хорижникидан бир неча баробар арзон нархларда ички бозорга чиқарилмоқда. Шунингдек, уларнинг 30 фоизи Қозоғистон, Тожикистон, Қирғизистон ва Афғонистонга сотилмоқда. Биргина июль—август ойларида 500 минг долларлик маҳсулот экспорт қилинган. Айни пайтда бу ерда 270 нафар ишчи ва мутахассис ишлайди.
Мавзуга доир: Шавкат Мирзиёев метрополитеннинг Юнусобод йўналишида олиб борилаётган қурилиш ишлари билан танишди (фото)
Президент ташрифи давомида корхона томонидан 2020—2021 йилларда амалга оширилиши режалаштирилган лойиҳа ҳақида маълумот берилган. Унга кўра, ҳозирда Ўзбекистонга импорт қилинаётган катта ўлчамдаги керамогранит кафеллар ишлаб чиқариш йўлга қўйилади. Яна 700 та иш ўрни яратилади.
Шунингдек, Тошкентда саноат ва хизмат кўрсатиш соҳаларида амалга оширилиши режалаштирилган лойиҳалар тақдимоти ҳам ўтказилган.
Изоҳ (0)