“Valyutani tartibga solish to‘g‘risida”gi qonunning avvalgi tahririga muvofiq, jismoniy shaxslar faqat xorijga chiqqan vaqtidagina chet elda hisob raqam ochishi mumkin edi va chet elda qaytishda hisob raqamni yopib, qolgan pullarni O‘zbekistonga o‘tkazishi majburiy edi.

Qonunning 22-oktabr kuni Prezident Shavkat Mirziyoyev tomonidan imzolangan yangi tahriridan ushbu cheklov va talablar chiqarib tashlangan — endi rezident jismoniy shaxslar O‘zbekiston banklarida va O‘zbekistondan tashqarida chet el valyutasida hisobvaraqlar hamda omonatlar ochishga haqli.

Qonun imzolangani munosabati bilan Markaziy bankda 23-oktabr kuni tashkil etilgan matbuot anjumanida bank raisi o‘rinbosari Bobur Abubakirov ushbu yangilik yuzasidan izoh berarkan, fuqarolarning xorijda ochgan hisobraqamlarini hech qanaqasiga nazorat qilib bo‘lmaganini tan oldi.

 

“Bu narsani qonuniy yoki boshqa yo‘l bilan nazorat qilishning mexanizmi amalda yo‘q. Nazorat qilib bo‘lmaydi ham. Nazorat qilolmaydigan narsamizga cheklov o‘rnatish esa mantiqsizlik. Qonunning yangi tahririga ko‘ra, endi jismoniy shaxsning chet elda hisob raqamlar ochishiga hech qanday ruxsat talab etilmaydi. Fuqaro o‘zi istagan bankda, o‘zi tanlagan xorijiy mamlakatda hisob raqam ochishi va mazkur hisob raqamdan erkin foydalanish huquqiga ega”, — deya Bobur Abubakirovning so‘zlaridan iqtibos keltirmoqda “Daryo” muxbiri Musulmonbek Ibrohimov.

Ayni vaqtda, rezident yuridik shaxslar O‘zbekistondan tashqarida hisobvaraqlar ochganidan keyin ro‘yxatdan o‘tgan joydagi soliq organlarini hamda Markaziy bankni hisobvaraqlar ochilganligi (yopilganligi) to‘g‘risida va hisobvaraqlarning rekvizitlari o‘zgarganligi haqida, shuningdek, ushbu hisobvaraqlardagi qoldiqlar va aylanmalar to‘g‘risida Markaziy bank tomonidan belgilangan tartibda har chorakda, hisobot choragi tugaganidan keyin bir oydan kechiktirmasdan xabardor qilishi shart.

Shuningdek, yangi qonunga muvofiq, rezidentlar O‘zbekiston banklaridagi yoki O‘zbekistondan tashqaridagi banklardagi o‘z hisobvaraqlaridan O‘zbekiston banklaridagi o‘z hisobvaraqlariga chet el valyutasini cheklovlarsiz o‘tkazish huquqiga ega bo‘ldi.