«Валютани тартибга солиш тўғрисида»ги қонуннинг аввалги таҳририга мувофиқ, жисмоний шахслар фақат хорижга чиққан вақтидагина чет элда ҳисоб рақам очиши мумкин эди ва чет элда қайтишда ҳисоб рақамни ёпиб, қолган пулларни Ўзбекистонга ўтказиши мажбурий эди.
Қонуннинг 22 октябрь куни Президент Шавкат Мирзиёев томонидан имзоланган янги таҳриридан ушбу чеклов ва талаблар чиқариб ташланган — энди резидент жисмоний шахслар Ўзбекистон банкларида ва Ўзбекистондан ташқарида чет эл валютасида ҳисобварақлар ҳамда омонатлар очишга ҳақли.
Қонун имзолангани муносабати билан Марказий банкда 23 октябрь куни ташкил этилган матбуот анжуманида банк раиси ўринбосари Бобур Абубакиров ушбу янгилик юзасидан изоҳ бераркан, фуқароларнинг хорижда очган ҳисобрақамларини ҳеч қанақасига назорат қилиб бўлмаганини тан олди.
«Бу нарсани қонуний ёки бошқа йўл билан назорат қилишнинг механизми амалда йўқ. Назорат қилиб бўлмайди ҳам. Назорат қилолмайдиган нарсамизга чеклов ўрнатиш эса мантиқсизлик. Қонуннинг янги таҳририга кўра, энди жисмоний шахснинг чет элда ҳисоб рақамлар очишига ҳеч қандай рухсат талаб этилмайди. Фуқаро ўзи истаган банкда, ўзи танлаган хорижий мамлакатда ҳисоб рақам очиши ва мазкур ҳисоб рақамдан эркин фойдаланиш ҳуқуқига эга», — дея Бобур Абубакировнинг сўзларидан иқтибос келтирмоқда «Дарё» мухбири Мусулмонбек Иброҳимов.Айни вақтда, резидент юридик шахслар Ўзбекистондан ташқарида ҳисобварақлар очганидан кейин рўйхатдан ўтган жойдаги солиқ органларини ҳамда Марказий банкни ҳисобварақлар очилганлиги (ёпилганлиги) тўғрисида ва ҳисобварақларнинг реквизитлари ўзгарганлиги ҳақида, шунингдек, ушбу ҳисобварақлардаги қолдиқлар ва айланмалар тўғрисида Марказий банк томонидан белгиланган тартибда ҳар чоракда, ҳисобот чораги тугаганидан кейин бир ойдан кечиктирмасдан хабардор қилиши шарт.
Шунингдек, янги қонунга мувофиқ, резидентлар Ўзбекистон банкларидаги ёки Ўзбекистондан ташқаридаги банклардаги ўз ҳисобварақларидан Ўзбекистон банкларидаги ўз ҳисобварақларига чет эл валютасини чекловларсиз ўтказиш ҳуқуқига эга бўлди.
Изоҳ (0)