O‘zbekistonda OAV to‘rtinchi hokimiyatdan birinchi hokimiyat darajasiga ko‘tarildi. Bu haqda Andijon viloyati hokimi Shuhratbek Abdurahmonov 19-oktabr kuni Open Andijan birinchi xalqaro investitsiya forumi doirasida jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
“OAV to‘rtinchi hokimiyat deyiladi. O‘ylashimcha, bugun O‘zbekistonda jurnalistika birinchi hokimiyat darajasiga ko‘tarildi. Men jurnalistlar bilan ishlashga, qanday savollar bo‘lsa, javob berishga hamisha tayyorman”, — dedi Abdurahmonov.
O‘z navbatida, Andijon hokimi jurnalist va blogerlardan mavzularni yoritish u yoki bu hodisaga munosabat bildirish vaqtida O‘zbekistonda 25 yilda yig‘ilib qolgan muammolarni hisobga olishlarini so‘radi.
“Respublika 25 yil yopiq tizimda ishladi. Xalq dardini eshitmaganmiz, ular bilan muloqot ham qilmaganmiz. Buni tan olib aytish kerak. Hech kim farishta emas va o‘zini oqlamaydi. Muammolar girdobida qolib ketganmiz. Xalqning dardi to‘lib-toshib ketgan ekan. Muammolar yechilyapti, yana oldimizda hal qilinishi kerak bo‘lgan masalalar turibdi”, — dedi hokim.
Izoh (0)