Moldova bog‘bonlari 2019-yilda birinchi marta mamlakatda ishchi kuchi keskin yetishmasligiga duch keldi, deb yozmoqda East-Fruit nashri.

Foto: East-Fruit

Oqibatda bu yil rekord daradaja bo‘lishi kutilayotgan olma hosili ba’zida maqbul vaqtda terib olinmay, uni saqlash vaqtida yo‘qotish xavfi tug‘iladi.

Yirik bog‘dorchilik xo‘jaliklari mavsum boshidayoq Markaziy Osiyodan ishchilar qidirishni boshlagan. Xususan, o‘zbekistonlik ishchilar rasmiy ravishda bir nechta korxonalarda ish bilan ta’minlangan.

Korxona vakillarining so‘zlariga ko‘ra, Moldovadagi o‘zbekistonlik ishchilar bajargan ishi natijasiga qarab kuniga 40 dollargacha pul oladi.

Shunday qilib, Moldovada ishlagan o‘zbekistonlik ishchilar bir oyda 600 dollardan 1000 dollargacha ishlab topishi mumkin, chunki ular ish haqidan tashqari uy-joy va oziq-ovqat bilan ta’minlanadi. Biroq ish kuni ham 10—12 soat davom etadi.

Moldova har yili 200 million dollardan ortiq qiymatga ega 400 ming tonnadan ortiq meva va sabzavot eksport qiladi. Shu bilan birga, Moldova marketingga juda kam mablag‘ sarflaydi, shuning uchun mevalar odatda juda arzon narxlarda eksport qilinadi.

Bu esa o‘z navbatida vizasiz rejimga ega Moldovadan Yevropa davlatlariga mavsumiy ishga ketishni afzal ko‘rgan ishchilar maoshini oshirish uchun kuchli to‘siqdir.