Молдова ўзбекистонлик ишчиларни олма теришга жалб қилмоқда. Улар ойига 1000 долларгача ишлаб топиши мумкин

Молдова боғбонлари 2019 йилда биринчи марта мамлакатда ишчи кучи кескин етишмаслигига дуч келди, деб ёзмоқда East-Fruit нашри.

Оқибатда бу йил рекорд дарадажа бўлиши кутилаётган олма ҳосили баъзида мақбул вақтда териб олинмай, уни сақлаш вақтида йўқотиш хавфи туғилади.

Йирик боғдорчилик хўжаликлари мавсум бошидаёқ Марказий Осиёдан ишчилар қидиришни бошлаган. Хусусан, ўзбекистонлик ишчилар расмий равишда бир нечта корхоналарда иш билан таъминланган.

Корхона вакилларининг сўзларига кўра, Молдовадаги ўзбекистонлик ишчилар бажарган иши натижасига қараб кунига 40 долларгача пул олади.

Шундай қилиб, Молдовада ишлаган ўзбекистонлик ишчилар бир ойда 600 доллардан 1000 долларгача ишлаб топиши мумкин, чунки улар иш ҳақидан ташқари уй-жой ва озиқ-овқат билан таъминланади. Бироқ иш куни ҳам 10—12 соат давом этади.

Молдова ҳар йили 200 миллион доллардан ортиқ қийматга эга 400 минг тоннадан ортиқ мева ва сабзавот экспорт қилади. Шу билан бирга, Молдова маркетингга жуда кам маблағ сарфлайди, шунинг учун мевалар одатда жуда арзон нархларда экспорт қилинади.

Бу эса ўз навбатида визасиз режимга эга Молдовадан Европа давлатларига мавсумий ишга кетишни афзал кўрган ишчилар маошини ошириш учун кучли тўсиқдир.