Joriy yil sentabr oyi davomida “O‘zneftegazinspeksiya” tomonidan respublikada gazdan noqonuniy foydalanish bo‘yicha o‘tkazilgan profilaktik tadbirlar davomida gaz ta’minotiga noqonuniy ulanish orqali 300 dan ortiq holat aniqlandi. Bu haqda inspeksiya axborot xizmati ma’lum qildi.
Mazkur holatlar oqibatida jami 8 milliard so‘mga yaqin, 7 million 682 ming metr kub tabiiy gazdan noqonuniy ravishda foydalanib, zarar yetkazilganligi aniqlandi.
Xususan, Andijon viloyatida joylashgan ohak ishlab chiqarish sexida 390 million so‘mdan ortiq, 394 ming metr kub, shuningdek, Toshkent viloyatida joylashgan ohak ishlab chiqarish sexida jami 128 million so‘mdan ortiq 128 772 metr kub tabiiy gazdan noqonuniy foydalanganligi aniqlandi.
Toshkent viloyatida tabiiy gazdan noqonuniy iste’mol qilish hajmi jami 1 milliard so‘mlik 956 ming metr kubni tashkil etdi.
Umuman olganda, joriy yil boshidan beri 2250 dan ortiq tabiiy gazdan noqonuniy ravishda foydalanish holatlari aniqlangan bo‘lib, tegishli choralar ko‘rish uchun hujjatlar huquqni muhofaza qilish organlariga topshirildi.
Siqilgan va suyultirilgan gazdan foydalanish qoidalariga rioya qilish bo‘yicha profilaktik tadbirlar davom etmoqda.
Izoh (0)