Ўзбекистонда сентябрь ойида газдан ноқонуний фойдаланиш ҳолатлари сабаб давлатга 8 млрд сўмлик зарар етказилган

Жорий йил сентябрь ойи давомида «Ўзнефтегазинспекция» томонидан республикада газдан ноқонуний фойдаланиш бўйича ўтказилган профилактик тадбирлар давомида газ таъминотига ноқонуний уланиш орқали 300 дан ортиқ ҳолат аниқланди. Бу ҳақда инспекция ахборот хизмати маълум қилди.

Мазкур ҳолатлар оқибатида жами 8 миллиард сўмга яқин, 7 миллион 682 минг метр куб табиий газдан ноқонуний равишда фойдаланиб, зарар етказилганлиги аниқланди.

Хусусан, Андижон вилоятида жойлашган оҳак ишлаб чиқариш цехида 390 миллион сўмдан ортиқ, 394 минг метр куб, шунингдек, Тошкент вилоятида жойлашган оҳак ишлаб чиқариш цехида жами 128 миллион сўмдан ортиқ 128 772 метр куб табиий газдан ноқонуний фойдаланганлиги аниқланди.

Тошкент вилоятида табиий газдан ноқонуний истеъмол қилиш ҳажми жами 1 миллиард сўмлик 956 минг метр кубни ташкил этди.

Умуман олганда, жорий йил бошидан бери 2250 дан ортиқ табиий газдан ноқонуний равишда фойдаланиш ҳолатлари аниқланган бўлиб, тегишли чоралар кўриш учун ҳужжатлар ҳуқуқни муҳофаза қилиш органларига топширилди.

Сиқилган ва суюлтирилган газдан фойдаланиш қоидаларига риоя қилиш бўйича профилактик тадбирлар давом этмоқда.