Belarus prezidenti dalalarida Shavkat Mirziyoyev yuborgan qovun urug‘laridan mo‘l-ko‘l hosil olindi

Belarus prezidentining tajriba maydonlarida yig‘im-terim mavsumi davom etmoqda. Bu haqda mazkur davlat rahbari matbuot xizmati ma’lum qildi.

Aleksandr Lukashenko sohadagi so‘nggi tendensiyalardan xabardor bo‘lish, texnologiyalar va yangi navlarni sinab ko‘rish uchun shaxsan o‘zi tajribalar o‘tkazmoqda. Shundan so‘ng ishlanmalarning eng muvaffaqiyatlilari amaliyotga tatbiq etiladi.

“2019-yilda poliz mahsulotlari urug‘i to‘g‘ridan-to‘g‘ri O‘zbekistondan keltirildi. Belarus yetakchisi iltimosiga ko‘ra uning hamkasbi va do‘sti Shavkat Mirziyoyev o‘zbek qovunlarining eng yaxshi urug‘larini yubordi. Belarus prezidenti issiqxonasida bir necha kun mobaynida hosil yig‘ib olindi”, — deyiladi matbuot xizmati xabarida.

Lukashenko, garchi masofadan bo‘lsa ham, Belarus va Tojikiston do‘stlik bog‘ini e’tibor bilan kuzatib bormoqda. Markaziy Osiyodan Brest viloyatiga 6 ming dona o‘rik, olma, gilos ko‘chatlari va uzumning bir necha eng a’lo navlari keltirildi.

Hozirda prezident dalalarida turli navdagi kartoshkalarni terib olish ham ommaviy ravishda boshlandi.