Avvalroq, Toshkentdagi xotin-qizlar mehnat qiladigan mehnat bozorlari, xalq tilida aytganda “mardikor” bozoridan videoreportaj taqdim etilgandi. O‘zbekiston Xotin-qizlar qo‘mitasi mas’ullari mazkur bozorlarda bo‘lib, viloyatlardan ish izlab kelgan 287 nafar xotin-qiz bilan uchrashdi. Muloqotlar chog‘ida ularning ijtimoiy-iqtisodiy muammolari chuqur o‘rganildi. Bu haqda O‘zbekiston Xotin-qizlar qo‘mitasi jamoatchilik va ommaviy axborot vositalari bilan aloqalar xizmati xabar berdi.
O‘zaro suhbatlar chog‘ida mardikor ayollar joylarda taklif qilinayotgan ish o‘rinlari uchun to‘lanadigan oylik maoshlarining kamligi, markaziy shaharlarda ularning xizmatiga yuqoriroq narx to‘lanishi, aksariyat hollarda turar joyga ehtiyojlarining balandligi, to‘y qilish va uy-joylarini ta’mirlatish, farzandlarining kontrakt pullarini to‘lashlari, kasal yaqinlarini davolatishlari uchun katta mablag‘ zarurligini asosiy sabab sifatida keltirgan.
Qolaversa, joylardagi yashash sharoitlaridan ko‘ra, poytaxt sharoitining ma’qulligi, hududlarda gaz va elektr energiyasida uzluksiz uzilishlarning mavjudligini ham aytib o‘tgan.
Shuningdek, bu ayollar ayrim ish beruvchilar ishlatib, pulini bermasliklarini, ba’zi hollarda zo‘ravonlik holatlariga ham uchrayotganliklarini ma’lum qilgan.
Muloqot yakunida O‘zbekiston Xotin-qizlar qo‘mitasi mutasaddilari hamkor tashkilotlar bilan birgalikda ayollarning ba’zi muammolarini (masalan, bolasiga guvohnoma yoki pasport olish, bog‘cha va maktabga joylash, oilaviy kelishmovchiliklarni bartaraf etish hamda kreditga uy olib, to‘lolmayotgan ayollarni o‘z viloyatlarida maoshi yuqoriroq bo‘lgan ish o‘rinlariga joylash kabi) hal etishga ko‘maklashdi.
Izoh (0)