Toshkent viloyatining Parkent tumanidagi O‘zbekiston Fanlar akademiyasiga qarashli Fizika-Quyosh instituti buzilishi va ko‘chirilishi rejalashtirilmagan. Bu haqda “Gazeta.uz” xabar bermoqda.
Bu haqda 20-sentabr, juma kuni qator ommaviy axborot vositalari noto‘g‘ri xabar tarqatgandi.
Bunga Normativ-huquqiy hujjatlar muhokamasi portalida joylashtirilgan hukumat farmoyishi talqini sabab bo‘ldi. Ushbu hujjatga ko‘ra Toshkent viloyatining Qibray tumani Chirchiq daryosining chap qirg‘og‘i, “Ho‘kizorol” noruda mahsulotlari koni hududidagi Xalqaro quyosh energiyasi institutining tajriba laboratoriyasiga ajratilgan 50 gektar yer maydoni o‘rniga, laboratoriya talablarini qondiradigan boshqa yer maydoni ajratish, kon hududining 2 gektar qismida joylashgan laboratoriya bino va inshootlarini yangi taklif etilayotgan hududga ko‘chirib o‘tkazish belgilangan.
Bundan ko‘zda tutilgan maqsad Qibray va Yuqorichirchiq tumanlari hududidan o‘tuvchi uzunligi 19,2 kilometr va Qibray tumani hududidan o‘tuvchi uzunligi 15 kilometr bo‘lgan umumiy foydalanishdagi avtomobil yo‘lini qurish hamda Toshkent xalqaro aeroporti 4-terminali qurilishini jadallashtirish, kelgusida Toshkent viloyati va Toshkent shahrida olib boriladigan yo‘l-qurilish ishlariga noruda mahsulotlarni yetkazib berish ekanligi qayd etilgan.
Toshkent viloyati hokimligiga Xalqaro quyosh energiyasi institutining tajriba poligoniga bino-inshootlarini ko‘chirib o‘tkazilishi uchun Qibray tumani hududidan 2 gektar yer maydoni ajratib berilishini ta’minlash topshirilgan.
Geologiya va mineral resurslar, Ekologiya va atrof-muhitni muhofaza qilish va Avtomobil yo‘llari qo‘mitalariga ko‘rsatilgan hududdagi noruda mahsulotlar zahirasini va qazib olish ishlarining atrof-muhitga ta’sirini aniqlash hamda O‘zbekiston—Germaniya “Papenburg Uzbekistan” qo‘shma korxonasiga tegishli loyiha va litsenziya hujjatlarini ikki oy muddatda rasmiylashtirish vazifasi yuklatilgan.
Izoh (0)