O‘zbekiston iste’molchilar huquqlarini himoya qilish jamiyatlari federatsiyasi joylarda “Iste’molchi kutubxonasi”, “Iste’molchilar uyi” loyihalarini amalga oshirish bo‘yicha keng ko‘lamli ishlarni rejalashtirib olgan, bu haqda O‘zA yozadi.
Kelgusida 40 dan oshiq tuman va shaharda bu kabi loyihalar amalga oshiriladi.
Ayni vaqtda esa Farg‘ona viloyatining Bag‘dod, Dang‘ara, Qo‘shtepa, Farg‘ona tumanlarida mazkur loyihalar asosida qurilish ishlari olib borilmoqda. Federatsiya tizimidagi tashkilotlar ichida birinchi bo‘lib Oltiariq tumanida “Iste’molchi kutubxonasi” ishga tushirildi. Kutubxona bugungi kunda tuman aholisi, avvalo yoshlar uchun o‘zining xizmatlarini ko‘rsatmoqda.
Farg‘ona shahrida quriladigan “Iste’molchilar uyi” loyihalash-ekspertiza bosqichidan o‘tib, qurilish ishlarini boshlash arafasida turibdi.
Prezidentning Beshta muhim tashabbusni amalga oshirish doirasida Rishton tumanida amalga oshirilgan loyiha respublikada ikkinchi, loyihaning o‘ziga xosligi bo‘yicha respublikada birinchi deyish mumkin. Sababi bu yerda “Iste’molchi kutubxonasi” bilan bir qatorda tuman iste’molchilar huquqlarini himoya qilish jamiyati ma’muriy binosi ham qad ko‘tardi.
Loyiha bo‘yicha “Iste’molchi kutubxonasi” va jamiyat ma’muriy binosi yaxlit “Iste’molchilar uyi” kompleksini tashkil qildi. Maqsad tuman jamiyatiga turli masalalarda tashrif buyurayotgan iste’molchilar bu yerda nafaqat o‘zlarini qiynab turgan muammolari bilan murojaat qilishi, bepul huquqiy maslahat olishi, balki qo‘shimcha ma’naviy oziqa olishlari uchun ham sharoit hozirlanmoqda.
“Iste’molchilar uyi”ni ochilishida O‘zbekiston iste’molchilar huquqlarini himoya qilish jamiyatlari federatsiyasi raisi Jahongir Sarimsoqov ishtirok etdi.
Izoh (0)