O‘zbekistonning Rossiyaning Qozon shahridagi Bosh konsuli Fariddin Nasriyev 25-avgust kuni yo‘l-transport hodisasida jarohatlanganlarga yordam berishda mardonavor harakati uchun O‘zbekiston fuqarosi Danil Yo‘ldoshevga tashakkurnoma topshirdi. Bu haqda O‘zbekiston TIV matbuot xizmati ma’lum qildi.
Perm shahrida 17-avgust kuni shahar avtobusi YTHga uchrab binoga urilgan edi. Oqibatda bir odam hodisa joyida vafot etgan, 32 dan ortiq shaxslar jarohat olgan. Mashg‘ulotga ketayotgan Danil Yo‘ldoshev to‘xtab, ularga yordam bergandi.
U qiyshayib ketgan orqa eshiklarni buzib, avtobusdan odamlarni olib chiqqan va o‘tib ketayotgan mashinalar haydovchilaridan jarohatlanganlarni kasalxonaga olib borishni so‘ragan. “Tez yordam” kelganidan so‘ng ham shifokorlarga yordam berishda davom etgan.
Bosh konsulxonada O‘zbekiston fuqarosiga madonavor harakati va insonparvarligi uchun tashakkurnoma topshirish marosimida bandlik va mehnat munosabatlari vazirining birinchi o‘rinbosari Erkin Muhitdinov hamda oliy va o‘rta-maxsus ta’lim vazirining birinchi o‘rinbosari Murodullo Xolmuhamedov ishtirok etdi va tashakkurnomaga imzo chekdi.
Avvalroq Danil Yo‘ldoshev insonlarni qutqarishda ko‘rsatgan jasorati va qat’iyligi uchun Perm o‘lkasi gubernatori Maksim Reshetnikovdan minnatdorlik xati olgandi.
Izoh (0)