Tramp Rossiya tufayli G7 yetakchilari bilan san-manga bordi
AQSh prezidenti Donald Tramp Biarissadagi G7 sammitida Rossiya guruh tarkibiga qaytishi kerakligini uqtirib, katta yettilikning boshqa yetakchilari bilan san-manga borib qoldi.
Trampga ko‘ra, “Eron, Suriya va Shimoliy Koreya muammolarini muhokama etish uchun Rossiya zalda bo‘lishi lozim”.
Uchrashuv ishtirokchilari orasida AQSh prezidentini faqat Italiyaning iste’foga chiqayotgan bosh vaziri Juzeppe Konte qo‘llab-quvvatladi. Yaponiya bosh vaziri Sindzo Abe neytral qoldi, Buyuk Britaniya bosh vaziri Boris Jonson, Germaniya kansleri Angela Merkel, Kanada bosh vaziri Jastin Tryudo, Fransiya prezidenti Emmanuel Makron va Yevrokengash rahbari Donald Tusk G8 shakliga qaytishga qarshi bo‘ldi.
Kechki taomdan so‘ng G7 yetakchilarining umumiy fotoga tushishi ko‘zda tutilgandi, biroq tadbir to‘satdan qoldirildi.
