Rossiyadagi neft mahsulotlari saqlanuvchi omborda 4 nafar O‘zbekiston fuqarosi zaharlandi. Ulardan biri vafot etdi

O‘zbekistonning Rossiyadagi elchixonasi konsullik bo‘limi bergan ma’lumotga ko‘ra 20-avgust kuni Ryazan viloyatidagi sobiq “Ximvolokno” zavodi hududida neft mahsulotlarini saqlash omborini tozalayotganda 4 nafar O‘zbekiston fuqarosi zaharlandi, deb xabar berdi TIV matbuot xizmati.

Ulardan biri Z.A. voqea joyida vafot etdi, ikki nafariga tibbiy yordam ko‘rsatilmoqda, bir nafariga esa vrachlar tomonidan ruxsat berilgan.

Elchixonaning konsullik bo‘limi vaziyatni o‘z nazoratiga oldi hamda Ryazan viloyatidagi o‘zbek diasporasi va O‘zbekiston Bandlik va mehnat munosabatlari vazirligi Tashqi mehnat migratsiyasi agentligining Moskva shahridagi Vakolatxonasi bilan birgalikda marhumning jasadini vatanga yuborish bo‘yicha tashkiliy va boshqa masalalar bilan shug‘ullanmoqda.

“Konsullik-huquqiy departamenti marhumning oila a’zolari va yaqinlariga ta’ziya bildiradi va eslatib o‘tadiki, Rossiyaning Markaziy federal okrugi (Belgorod viloyati, Bryansk viloyati, Vladimir viloyati, Voronej viloyati, Ivanovo viloyati, Kaluga viloyati, Kastroma viloyati, Kursk viloyati, Lipetsk viloyati, Moskva shahri, Moskvа viloyati, Orlov/Oryol viloyati, Ryazan viloyati, Smolensk viloyati, Tambov viloyati, Tver viloyati, Tula viloyati, Yaroslav viloyati) va Armaniston hududidagi fuqarolarimiz zarur vaziyatlarda Moskva shahridagi Elchixonaga quyidagi telefon raqamlari orqali murojaat qilishlari mumkin: : +7 499 230-00-76, +7 499 238-36-20”, — deyiladi xabarda.