Yana uchta holat bo‘yicha ayblanayotgan Gulnora Karimova, erining 5 milliard so‘mini o‘g‘irlagan ayol, xotinini vahshiylarcha o‘ldirgan erkak va kunning boshqa xabarlari
19-avgustning e’tiborga molik yangiliklari — “Daryo” dayjestida.
Bosh prokuratura tomonidan Gulnora Karimovaga nisbatan davlat mulkini talon-toroj qilish, O‘zbekiston Respublikasi manfaatlariga zid bitimlar tuzish hamda o‘zgalarning juda ko‘p miqdordagi mulkini tovlamachilik yo‘li bilan qo‘lga kiritish holatlari yuzasidan jinoyat ishlari qo‘zg‘atildi.
Gulnora Karimova qayd etilgan aksiyalarni chet el tadbirkorlariga sotgan hamda ularning noqonuniy faoliyatiga rahnamolik qilib, respublika manfaatlariga juda ko‘p miqdorda zarar yetkazgan, deyiladi xabarda.
***
Qo‘qonda yog‘och, shakar, shirinliklar savdosi bilan shug‘ullanadigan tadbirkor I.I.ga nisbatan sodir etilgan o‘g‘irlik jinoyatida tadbirkorning o‘z xotini Z.I., uning haydovchisi O.I., xotinining dugonasi va dugonasining turmush o‘rtog‘i A.D. va R.U. hamda Qo‘qon shahrida mashhur bo‘lgan folbin M.A.ga nisbatan jinoyat ishi ochildi.
Z.I. turmush o‘rtog‘i I.I. bilan oilaviy munosabatlari sababli o‘zaro kelisholmay o‘z ota uyiga ketib qolib, shu yerda yashab yurgan vaqtda avvalari oilasiga haydovchilik qilgan I.O. bilan gaplashib, u bilan yaqin munosabatda bo‘lgan. Unga turmush o‘rtog‘i I.I.ning yotoqxonasidagi juda ko‘p miqdorda pullar saqlanadigan seyfning kalit nusxasini bergan.
I.O. esa berilgan kalit yordamida seyfni ochib, uning ichidan I.I. va uning yaqin qarindoshlariga tegishli qiymati 5 milliard 508 million 625 ming 609 so‘mni tashkil qilgan 680 000 dollar pullarni talon-toroj qilib, hodisa joyidan yashiringan. Shundan so‘ng I.O. va Z.I. jinoiy yo‘l bilan qo‘lga kiritilgan pullarni o‘rtada taqsimlab, o‘zlarining shaxsiy ehtiyojlari uchun sarflagan.
***
Qoraqalpog‘iston Respublikasi Xo‘jayli tumanida Hayit bayrami kuni mudhish qotillik sodir etildi.
11-avgustdan 12-avgustga o‘tar kechasi soat 00:20 larda Xo‘jayli tumani “Mustaqillik” OFY hududida yashovchi fuqaro A.Q. turmush o‘rtog‘i 1994-yilda tug‘ilgan M.Q. bilan uyida o‘zaro oilaviy janjallashib qolib, rashk oqibatida, qasddan o‘ldirish maqsadida turmush o‘rtog‘i M.Q. uxlash uchun yotoqxonasiga kirib, uyquga ketgan vaqtda, yotoqxonaga kirib, oshxona pichog‘i bilan uning ko‘krak qafasiga va tanasining boshqa joylariga bir necha marta qasddan urgan.
***
19-avgustdan boshlab qator banklar dollarni 9150 so‘mdan, yevroni 10 510 so‘mdan sotib olmoqda. Dollarni sotish kursi 9200 so‘m, yevro esa 10 510 so‘m.
Eslatib o‘tamiz, 16-avgustdan boshlab dollarning rasmiy kursi 9061 so‘m, yevro esa 10 092,14 so‘mni tashkil qiladi.
***
Internetda O‘zbekiston Prezidenti uchun maxsus tayyorlangan Boeing 787-800 Dreamliner samolyotining ilk suratlari paydo bo‘ldi.
“Boeing 787-800, Dreamliner VIP, Uzbek Air Force One, Registration No: UK001. MSN: 64435. Bayrog‘imizning ranglari juda yarashibdi! Xalqning xizmatini bajarishda Prezidentimizga ko‘makdosh bo‘lsin bu samolyot! Bu samolyot Xudo xohlasa ko‘p yillar xizmat qiladi. Endi bemalol transatlantik parvozlarni to‘xtamasdan amalga oshirsa bo‘ladi!”, — deyilgan xabarda.
***
O‘zbekistonning sobiq bosh prokurori Rashidjon Qodirovning faoliyati davomida qilgan jinoyatlari aks ettirilgan hujjatli film namoyish etilishi ma’lum bo‘ldi.
Ko‘rsatuv tayyor va u katta ehtimol bilan avval “O‘zbekiston 24” va qisqa vaqt farqi bilan barcha davlat va xususiy telekanallar orqali efirga uzatilishi aytilmoqda.
