19 августнинг эътиборга молик янгиликлари — «Дарё» дайжестида.
Бош прокуратура томонидан Гулнора Каримовага нисбатан давлат мулкини талон-торож қилиш, Ўзбекистон Республикаси манфаатларига зид битимлар тузиш ҳамда ўзгаларнинг жуда кўп миқдордаги мулкини товламачилик йўли билан қўлга киритиш ҳолатлари юзасидан жиноят ишлари қўзғатилди.
Гулнора Каримова қайд этилган акцияларни чет эл тадбиркорларига сотган ҳамда уларнинг ноқонуний фаолиятига раҳнамолик қилиб, республика манфаатларига жуда кўп миқдорда зарар етказган, дейилади хабарда.
***
Қўқонда ёғоч, шакар, ширинликлар савдоси билан шуғулланадиган тадбиркор И.И.га нисбатан содир этилган ўғирлик жиноятида тадбиркорнинг ўз хотини З.И., унинг ҳайдовчиси О.И., хотинининг дугонаси ва дугонасининг турмуш ўртоғи А.Д. ва Р.У. ҳамда Қўқон шаҳрида машҳур бўлган фолбин М.А.га нисбатан жиноят иши очилди.
З.И. турмуш ўртоғи И.И. билан оилавий муносабатлари сабабли ўзаро келишолмай ўз ота уйига кетиб қолиб, шу ерда яшаб юрган вақтда аввалари оиласига ҳайдовчилик қилган И.О. билан гаплашиб, у билан яқин муносабатда бўлган. Унга турмуш ўртоғи И.И.нинг ётоқхонасидаги жуда кўп миқдорда пуллар сақланадиган сейфнинг калит нусхасини берган.
I.О. эса берилган калит ёрдамида сейфни очиб, унинг ичидан И.И. ва унинг яқин қариндошларига тегишли қиймати 5 миллиард 508 миллион 625 минг 609 сўмни ташкил қилган 680 000 доллар пулларни талон-торож қилиб, ҳодиса жойидан яширинган. Шундан сўнг И.О. ва З.И. жиноий йўл билан қўлга киритилган пулларни ўртада тақсимлаб, ўзларининг шахсий эҳтиёжлари учун сарфлаган.
***
Қорақалпоғистон Республикаси Хўжайли туманида Ҳайит байрами куни мудҳиш қотиллик содир этилди.
11 августдан 12 августга ўтар кечаси соат 00:20 ларда Хўжайли тумани «Мустақиллик» ОФЙ ҳудудида яшовчи фуқаро А.Қ. турмуш ўртоғи 1994 йилда туғилган М.Қ. билан уйида ўзаро оилавий жанжаллашиб қолиб, рашк оқибатида, қасддан ўлдириш мақсадида турмуш ўртоғи М.Қ. ухлаш учун ётоқхонасига кириб, уйқуга кетган вақтда, ётоқхонага кириб, ошхона пичоғи билан унинг кўкрак қафасига ва танасининг бошқа жойларига бир неча марта қасддан урган.
***
19 августдан бошлаб қатор банклар долларни 9150 сўмдан, еврони 10 510 сўмдан сотиб олмоқда. Долларни сотиш курси 9200 сўм, евро эса 10 510 сўм.
Эслатиб ўтамиз, 16 августдан бошлаб долларнинг расмий курси 9061 сўм, евро эса 10 092,14 сўмни ташкил қилади.
***
Интернетда Ўзбекистон Президенти учун махсус тайёрланган Boeing 787-800 Dreamliner самолётининг илк суратлари пайдо бўлди.
«Boeing 787-800, Dreamliner VIP, Uzbek Air Force One, Registration No: UK001. MSN: 64435. Байроғимизнинг ранглари жуда ярашибди! Халқнинг хизматини бажаришда Президентимизга кўмакдош бўлсин бу самолёт! Бу самолёт Худо хоҳласа кўп йиллар хизмат қилади. Энди бемалол трансатлантик парвозларни тўхтамасдан амалга оширса бўлади!», — дейилган хабарда.
***
Ўзбекистоннинг собиқ бош прокурори Рашиджон Қодировнинг фаолияти давомида қилган жиноятлари акс эттирилган ҳужжатли фильм намойиш этилиши маълум бўлди.
Кўрсатув тайёр ва у катта эҳтимол билан аввал «Ўзбекистон 24» ва қисқа вақт фарқи билан барча давлат ва хусусий телеканаллар орқали эфирга узатилиши айтилмоқда.
Изоҳ (0)