Qozog‘istonning Olmaota shahrida o‘tkazilayotgan “Zo‘ravonlikka yetaklovchi ekstremizmga qarshi kurashishda OAVning roli” mavzusidagi xalqaro forumda Markaziy Osiyo davlatlarining mediamutaxassislari ekstremizmga qarshi kurashishning samarali usullari haqida va mamlakatlardagi vaziyatlar bo‘yicha ma’lumot berdi, deb xabar qiladi O‘zA.
Xususan, Qirg‘izistonda 700 nafarga yaqin yoshlar internet tarmog‘ida ekstremistik guruhlarga o‘ralashib qolgani aniqlangan. Ularning 70 nafari esa ijtimoiy tarmoqlarda ekstremistik guruhlarning videolarini o‘z sahifalarida bo‘lishib, ularga “layk” bosib xayrixohlik bildirganlari uchun jinoiy javobgarlikka tortilgan.
Ularning barchasi 18—20 yoshdagi o‘smirlardan iborat.
Qirg‘izistonlik mutaxassis, siyosiy fanlar nomzodi Nurgul Yesenamanovaning aytishicha, ko‘pincha mamlakat chegaralariga yaqin shaharlarda joylashgan qishloqlarda ekstremistik guruhlarga qo‘shilgan aholi soni yuqoriligi kuzatilmoqda.
Yesenamanovaning ta’kidlashicha, maktablarda islom dinini alohida fan sifatida o‘rgatish masalasi Qirg‘izistonda ham dolzarb. Ayni damda Qirg‘izistonda “Dunyo dinlari tarixi” darsligi ishlab chiqilmoqda. Ushbu kitob maktabning 9—10-sinf o‘quvchilariga mo‘ljallangan. Mazkur kitob avvaliga Qirg‘izistonning 50 ta maktabida tajriba-sinov tariqasida o‘qitilishi kutilmoqda.
Forumda ma’ruza bilan ishtirok etgan O‘zbekiston Xalqaro Islom akademiyasi ilmiy tadqiqotlar markazi rahbari, professor Baxtiyor Bobojonovning fikricha, maktablarda din peshvolarini dars berishi to‘g‘ri tanlov bo‘lmasligi mumkin.
Chunki, din peshvosi islom haqida tushuncha berar ekan, hissiyotga berilishi, dars da’vatga aylanib ketishi mumkin. Ba’zi davlatlarda islom dini darslaridan so‘ng, maktab o‘quvchilari ro‘mol o‘ramagan sinfdoshlariga va o‘qituvchilarga tazyiq o‘tkazgan hollar ham kuzatilgan. Professorning ta’kidlashicha, shu sababli maktablarda islom dini bo‘yicha ta’lim berishni cheklash to‘g‘ri emas. Maktablarda boshqa dinlar qatori islom dini haqida ham tushuncha berilishi ma’lum darajada yoshlarning ekstremistik guruhlar domiga tushib qolishining oldini oladi.
Izoh (0)