15-avgustning e’tiborga molik yangiliklari — “Daryo” dayjestida.
O‘zbekiston Markaziy banki 16-avgustdan xorijiy valyutalarning so‘mga nisbatan yangi qiymatini belgiladi.
Unga ko‘ra, 1 AQSh dollari 9-avgust kuni e’lon qilingan kursga nisbatan 179 so‘mga ko‘tarilgan va 1 dollar 9061 so‘mga yetgan.
***
13-avgust kuni Jizzax viloyatining Forish tumanida Nexia va Cobalt avtomobillari yuzma-yuz to‘qnashib ketdi.
Yo‘l-transport hodisasi oqibatida 5 kishi hayotdan ko‘z yumdi.
***
Rossiyada “Uralskiye avialini” aviakompaniyasining “Jukovskiy—Simferopol” yo‘nalishi bo‘yicha parvozga ko‘tarilgan samolyoti dvigatellaridagi qushlar tufayli favqulodda qo‘nishga majbur bo‘ldi.
Havo kemasi bortida 226 nafar yo‘lovchi va 7 nafar ekipaj a’zosi bo‘lgan.
“Ural aviakompaniyasi ekipaj a’zolari o‘zlarining mahorat va matonatlarini namoyon etishdi. Havo kemasi komandiri — yekaterinburglik Damir Yusupov. U va uning jamoasi 233 kishining hayotini saqlab qoldi. Qahramonlar”, — deya yozgan Sverdlov viloyati hokimi Yevgeniy Kuyvashev Instagram sahifasida.
Keyinroq Rossiya bosh vaziri Dmitriy Medvedev Podmoskovyeda favqulodda qo‘ndirilgan “Ural havo yo‘llari” aviakompaniyasining A321 layneri uchuvchilarini davlat mukofotlariga tavsiya etish haqidagi farmonni imzoladi.
Medvedevning ta’kidlashicha, ekipajning mohirona xatti-harakatlari tufayli aviafalokatning va yo‘lovchilar halokatining oldi olingan.
***
Britaniyaning Xilsboro shahrida yashovchi Ben Maskroft o‘z orzusini amalga oshira olmagani uchun 95 kilogrammga ozdi.
176 kg vaznli britaniyalik azaliy orzusini amalga oshirishga — Buyuk Xitoy devoriga chiqishga qaror qilgan, ammo samolyotdayoq noqulayliklarga duch kelgan. Chunonchi, xavfsizlik kamarini uzaytirishga to‘g‘ri kelgan, ko‘tarma stolcha esa uning qorni tufayli pastga tushmagan.
***
O‘zbekiston Prezidenti Shavkat Mirziyoyev raisligida 15-avgust kuni Xavfsizlik kengashining mamlakat tashqi siyosiy va tashqi iqtisodiy faoliyatining asosiy natijalari va istiqboldagi ustuvor yo‘nalishlariga bag‘ishlangan kengaytirilgan yig‘ilishi bo‘lib o‘tdi.
Yig‘ilishda mamlakatning xorijiy hamkorlar bilan birgalikda erishilgan amaliy natijalar, global tendensiyalar, shuningdek, jahon va mintaqada barqarorlik va xavfsizlikka tahdid solayotgan zamonaviy xatarlar ko‘rib chiqildi. Keyingi yillarga mo‘ljallangan tashqi siyosiy va tashqi iqtisodiy faoliyatning asosiy vazifalari belgilab olindi.
***
Qiynoqlarning oldini olish bo‘yicha markaz rahbari Nurdin Sulaymonov Almazbek Atambayevning vaqtincha saqlash hibsxonasidagi sharoitlarini o‘rgandi.
Ta’kidlanishicha, Almazbek Atambayev ikki o‘rinli kamerada saqlanmoqda. Siyosatchi izolyator xodimlari harakatlariga hech qanday e’tiroz bildirmagan.
Izoh (0)