Пекинда ШҲТ куни муносабати билан 21 июнь куни ўтказилган тантанали қабул доирасида «ШҲТнинг 8 мўъжизаси» мавзусидаги тақдимот бўлиб ўтди. Бу ҳақда Туризмни ривожлантириш давлат қўмитаси хабар берди.
ШҲТ котибияти томонидан ташкил этилган тадбирда 600 дан зиёд сиёсий, ижтимоий, бизнес доиралар ва дипломатик корпус вакиллари иштирок этган. ШҲТ бош котиби Владимир Норов ўз нутқида 18 йил аввал ташкилотга асос солишга доир қабул қилинган қарор ва унга аъзо давлатларнинг тинчлик ва барқарорликка йўналтирилган муҳим стратегик танлови бўлганини таъкидлаган.
Нуфузли меҳмонлар бош котиб ҳамроҳлигида «ШҲТнинг 8 мўъжизаси» кўргазмасини кўздан кечирган. Кўргазмадан ШҲТ мамлакатлари табиати, урф-одатлари, анъанавий либослари, ҳунармандчилик маҳсулотлари ва миллий таомларига бағишланган фотоматериаллар, видеороликлар ва қўлланмалар ўрин олган.
«ШҲТнинг 8 мўъжизаси» рўйхатидан Пои Калон меъморий ансамбли ҳам ўрин олган бўлиб, ташкилотга асос солинган куни ушбу тарихий масканнинг тақдимоти ҳам ўтказилган.
Пои Калон меъморий ансамбли Минораи Калон атрофидаги ҳудудни ўз ичига олади. Комплекс 12—14-асрларда 3 бинодан иборат бўлган: Минораи Калон, Масжиди Калон ва Мир Араб мадрасаси. Минораи Калон 1127 йилда Арслонхон томонидан бунёд этилган бўлиб, деярли 900 йил давомида таъмирланмаган. Унинг баландлиги 46,5 метрни ташкил қилади.
Изоҳ (0)