O‘zXDP qonunlarning 70 foizini xalqqa partiya yetkazayotgani va liberal g‘oyalar inqirozga uchrayotganini da’vo qilgan deputati uchun uzr so‘radi (video)

Joriy yil 31-iyul kuni “O‘zbekiston” telekanali orqali jonli efirga uzatilgan “Munosabat” ko‘rsatuvida Toshkent shahar “Nuroniy” jamg‘armasi raisi, O‘zXDPdan xalq deputatlari Toshkent shahar kengashi deputati Rustam Kalonovning liberal g‘oyalar to‘g‘risida bildirgan shaxsiy fikr-xulosalari turlicha talqinlarni keltirib chiqargan va ko‘pchilikning e’tirozlariga sabab bo‘lgan.

O‘zbekiston Xalq demokratik partiyasi Markaziy Kengashi ushbu holat uchun keng jamoatchilik, xususan, O‘zbekiston Liberal demokratik partiyasi tashkilotlari xodimlari, deputatlari hamda ko‘p ming sonli a’zolaridan uzr so‘radi.

“Markaziy Kengash O‘zbekiston Liberal demokratik partiyasining mamlakatimizda demokratik islohotlarni chuqurlashtirish yo‘lida olib borayotgan izchil faoliyatiga hurmat bilan qaraydi.

Shuningdek, O‘zbekiston Xalq demokratik partiyasi siyosiy raqobatda siyosiy madaniyat va odob-axloq qoidalariga qat’iy rioya etishini ma’lum qiladi. O‘z tizimidagi barcha xodimlari va deputatlarni ham shunga amal qilishga chaqiradi”, — deyiladi matnda.

Ma’lumot uchun, Rustam Kalonov ushbu chiqishida Oliy Majlis qabul qilayotgan va Prezident imzolayotgan qonun-qarorlarning 70 foizi XDP a’zolari orqali xalqqa yetib borayotganini da’vo qilgan. Dunyoda liberal g‘oyalar inqirozga uchrayotgani, “barcha ahmoqgarchilik va axloqsizliklar shu g‘oyalar tufayli paydo bo‘layotgani”ni bildirgan.