Joriy yil 30-iyul kuni Oliy Majlis Senati yoshlar, madaniyat va sport masalalari qo‘mitasining majlisi bo‘lib o‘tdi. Unda jismoniy tarbiyani yanada ommalashtirish, qolaversa, sportchilarni 2020-yilda Yaponiyaning Tokio shahrida o‘tkaziladigan yozgi olimpiada o‘yinlariga tayyorlash borasida olib borilayotgan ishlar yuzasidan Jismoniy tarbiya va sport vazirligi hamda O‘zbekiston Milliy Olimpiya qo‘mitasining axboroti eshitildi. Bu haqda jurnalist Jonibek Ma’rupov “Daryo”ga xabar qildi.
Majlisda mamlakatda jismoniy tarbiya va sportni yanada ommalashtirishga salbiy ta’sir ko‘rsatayotgan boshqa dolzarb masalalar mavjudligi borasida ham so‘z yuritildi.
“Hududlarda sport turlari bo‘yicha federatsiyalar tomonidan yoshlar orasidan iqtidorli sportchilarni tanlab olish, ya’ni seleksiyaning samarali va shaffof tizimi hanuzgacha to‘liq yaratilmagan. Agar seleksiya bo‘yicha ishlar samaradorligi, avvalo, maktablarda yaratilgan sharoitlarga bevosita bog‘liqligini inobatga olsak, bu boradagi ahvolni ham talab darajasida, deb bo‘lmaydi”, — deydi senator Ruziboy Saidov.
Ma’lumotlarga qaraganda, 10 mingga yaqin umumta’lim maktablarining 2,5 mingtasida sport zali yo‘q, 2,5 mingtasida mavjud zallar esa ta’mirtalab ahvolga kelib qolgan. Maktablarni sport anjomlari bilan ta’minlashda ham qator jiddiy kamchiliklar mavjud. Bundan tashqari, Bolalar va o‘smirlar sport maktablarining moddiy-texnika bazasi qoniqarli emas.
Seleksiya samaradorligida eng muhim bo‘g‘in hisoblangan mazkur tizimlardagi bunday ahvol bilan muvaffaqiyatga erishish mumkinmi!?
Shuni ham ta’kidlash o‘rinliki, sport inshootlari mavjud talab va hududlardagi aholi sonidan kelib chiqib joylashtirilmaganligi, aksariyat sport inshootlari infratuzilmasining jismonan va ma’nan eskirganligi, sport jihozlari bilan to‘liq ta’minlamaganligi ularda amalga oshirilayotgan ishlar natijadorligiga salbiy ta’sir ko‘rsatmoqda. Buning barobarida, joylarga mahalliy sport jihozlari va anjomlarini sifatli va arzon narxlarda yetkazib berish mexanizmi talab darajasida yo‘lga qo‘yilmagan.
Izoh (0)