Toshkentda buzilgan “Ezidyor” to‘yxonasi egasi va’da qilingan restoranni olishga urinmoqda

Grand Duet kompaniyasi Savdo-sanoat palatasiga yordam so‘rab murojaat qildi, deb xabar bermoqda Spot.

Ushbu kompaniya 2001-yildan buyon Olmazor ko‘chasi 19-uyda biznes-markaz xizmatlarini ko‘rsatgan. Bino Tashkent City qurilishi munosabati bilan buzilgan.

Buzilgan binoda “Ezidyor” to‘yxonasi ham bo‘lgani sababli Toshkent shahar hokimligiga kompaniyaga Mirzo Ulug‘bek tumanidagi “Sayohat” to‘yxonasini berish topshirilgan edi. Biroq bu kelishuv amalga oshmagani sabab, tadbirkor faoliyatini to‘xtatishiga va yuzlab ishchilarni ishdan bo‘shatishga majbur bo‘lgan.

Grand Duet Savdo-sanoat palatasi a’zosi bo‘lgani uchun palata korxonaning huquqiy va qonuniy manfaatlarini ta’minlash maqsadida Chilonzor tuman Ma’muriy sudiga murojaat qilgan. Sud 2019-yilning may oyida hal qiluv qarorini chiqargan bo‘lib, unda da’vo to‘liq qanoatlantirilgan.

Savdo-sanoat palatasida ta’kidlanishicha, ushbu hal qiluv qarori ijrosi amalda ta’minlangan taqdirdagina, tadbirkorning qonuniy manfaatlari to‘liq himoya qilingan, deb hisoblash mumkin.