Toshkent viloyatida to‘rt mingga yaqin haydovchi jarimalarni to‘lash muddatini o‘tkazib yuborgani ma’lum bo‘ldi

Toshkent viloyati IIBB YHXB joriy yilning 22-iyul kunidan boshlab yo‘l harakati qoidalarini buzib, jarimani belgilangan muddatda to‘lamay yurgan haydovchilarni aniqlash va fotoradarlar orqali qayd qilingan avtomashinalarni jarima maydoniga joylashtirishga qaratilgan tadbirlar o‘tkazishni boshlaydi. Bu haqda Toshkent viloyati IIBB matbuot xizmati xabar berdi.

Eslatib o‘tamiz, O‘zbekiston Respublikasi Ma’muriy javobgarlik to‘g‘risidagi kodeksning 291-moddasiga muvofiq (“Transport vositalarini ushlab turish va ko‘rikdan o‘tkazish asoslari va tartibi”), yo‘l harakati qoidalarini buzganlik uchun jarima solish haqida qaror chiqarilgan kundan e’tiboran oltmish kun ichida jarima to‘lanmagan taqdirda, transport vositasi ushlab turiladi.

Qancha muddatga? 

Jarima solish to‘g‘risidagi qarorning ijrosi yuzasidan ish yuritish tugaguniga qadar.

Bu haqda jarima solish to‘g‘risida qaror chiqargan vakolatli organ rahbari yozma ko‘rsatma beradi.

Hozirgi kunda transport vositasi egalarining manzillariga sodir etilgan qoidabuzarlik yuzasidan belgilangan jarimalar to‘g‘risida qarorlar yetkazilgan bo‘lsa-da, 3 800 dan ortiq haydovchilar tomonidan jarimalar muddati o‘tkazib yuborilgan.

Jumladan, Chinoz tumanida 529 ta, Angren shahrida 504 ta, Zangiota tumanida 487 ta, Yangiyo‘l tumanida 435 ta, Ohangaron tumanida 261 ta, O‘rta Chirchiq tumanida 224 ta, Yuqori Chirchiq 177 ta, Qibray tumanida 216 ta, Olmaliq shahrida 151 ta, Bekobod tumanida 131 ta, Parkent tumanida 116 ta, Chirchiq shahrida 105 ta, Bekobod shahrida 104 ta, Bo‘ka tumanida 95 ta, Oqqo‘rg‘on tumanida 68 ta, Piskent tumanida 60 ta, Bo‘stonliq tumanida 54 ta, Quyichirchiq tumanida 30 ta, Yangiyo‘l shahrida 20 ta, Toshkent tumanida 18 ta, Ohangaron shahrida 13 ta haydovchilar tomonidan belgilangan jarimalar muddati o‘tkazib yuborilgan.

Toshkent viloyati IIBB YHXB ma’lum qiladiki, viloyat hududida qarzdorlarni avtomatik tarzda aniqlovchi “Avtokon” komplekslari ishlamoqda.

Toshkent viloyati IIBB Yo‘l harakati xavfsizligi boshqarmasi qarzdorligi mavjud avtomashinalarni, qarzdorlik to‘liq to‘langunga qadar jarima maydoniga joylashtirish ishlari jadallashtirilganligini ma’lum qilib, fuqarolarni ortiqcha sarsongarchiliklarsiz sodir etgan qoidabuzarliklari bo‘yicha jarimalarni o‘z vaqtida to‘lashlari lozimligini yana bir bor eslatib o‘tadi.