WBO yangilangan reytingida Qudratillo Abduqahhorov pastladi, Shohjahon Ergashev esa o‘z o‘rnini saqlab qoldi

Butunjahon boks tashkiloti (WBO) iyul oyi uchun bokschilarning yangi reytingini e’lon qildi. Bu haqda GoSport xabar berdi.

Unga ko‘ra, mazkur reytingda super yengil vazn (-63,5 kg) toifasi vakili Shohjahon Ergashev (16 ta g‘alaba, 14 ta nokaut) 8-o‘rinni egalladi. U o‘tgan oyda ham 8-pog‘onada qayd qilingandi.

Ma’lumot uchun, Shohjahon ayni vaqtda WBA reytingida beshinchi, IBF reytingida esa 7-o‘rinda bormoqda.

Yarim o‘rta (-66,68 kg) vazn toifasida ringga chiqayotgan Qudratillo Abduqahhorov (16 ta g‘alaba, 9 ta nokaut) esa o‘tgan oydagiga nisbatan ikki o‘rin pastlab, 11-o‘rinni band etdi. Ayni damda Qudratillo  IBF reytingida birinchi, WBC reytingida esa to‘rtinchi o‘rinni egallab turibdi.

Reytingdan o‘zbekistonlik boshqa sportchilar joy olmagan.