Botir Xo‘jayev: O‘zbekiston aholisining taxminan 12—14 foizi kam ta’minlangan

Iqtisodiyot va sanoat vaziri Botir Xo‘jayev O‘zbekiston aholisining 12—14 foizi kam ta’minlangan darajada ekanligini ma’lum qildi. Bu haqda 22-iyul kuni Iqtisodiyot va sanoat vazirligi vakillari jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.

Axborot va ommaviy kommunikatsiyalar agentligida o‘tgan anjumanda vazir Botir Xo‘jayev aholining kam ta’minlanganlik darajasiga izoh berdi.

“Kam ta’minlangan, moddiy yordam olayotgan, oyligi yoki pensiya puli o‘rtacha tirikchilik uchun zarur mablag‘dan kam darajalarni shartli ravishda olaylik. Agar shu darajalarni umumlashtirib, uni dastlabki hisob-kitoblar asosida taqqoslama qiladigan bo‘lsak, O‘zbekiston aholisining taxminan 12—14 foizi kam ta’minlangan darjaga ega, degan xulosaga kelish mumkin”, — dedi Xo‘jayev.

Vazirning ta’kidlashicha, O‘zbekistonda o‘rtacha oylik taxminan 2,1 million so‘mni tashkil etmoqda.

Avvalaroq, Davlat statistika qo‘mitasi O‘zbekiston bo‘yicha yuridik shaxs maqomiga ega bo‘lgan korxona va tashkilotlarda ishlovchilarning o‘rtacha oylik nominal hisoblangan ish haqi 2019-yil yanvar—iyun oylarida 2,092 million so‘mni tashkil etganini ma’lum qilgan edi.