Иқтисодиёт ва саноат вазири Ботир Хўжаев Ўзбекистон аҳолисининг 12—14 фоизи кам таъминланган даражада эканлигини маълум қилди. Бу ҳақда 22 июль куни Иқтисодиёт ва саноат вазирлиги вакиллари журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Ахборот ва оммавий коммуникациялар агентлигида ўтган анжуманда вазир Ботир Хўжаев аҳолининг кам таъминланганлик даражасига изоҳ берди.
«Кам таъминланган, моддий ёрдам олаётган, ойлиги ёки пенсия пули ўртача тирикчилик учун зарур маблағдан кам даражаларни шартли равишда олайлик. Агар шу даражаларни умумлаштириб, уни дастлабки ҳисоб-китоблар асосида таққослама қиладиган бўлсак, Ўзбекистон аҳолисининг тахминан 12—14 фоизи кам таъминланган даржага эга, деган хулосага келиш мумкин», — деди Хўжаев.
Вазирнинг таъкидлашича, Ўзбекистонда ўртача ойлик тахминан 2,1 миллион сўмни ташкил этмоқда.
Аввалароқ, Давлат статистика қўмитаси Ўзбекистон бўйича юридик шахс мақомига эга бўлган корхона ва ташкилотларда ишловчиларнинг ўртача ойлик номинал ҳисобланган иш ҳақи 2019 йил январь—июнь ойларида 2,092 миллион сўмни ташкил этганини маълум қилган эди.
Изоҳ (0)