O‘zbekiston “Adolat” sotsial-demokratik partiyasining dasturi va saylovoldi dasturi muhokamasiga bag‘ishlangan videoselektor yig‘ilish bo‘lib o‘tdi. Bu haqda O‘zA xabar berdi.
Yig‘ilishda partiya siyosiy kengashi raisi Narimon Umarov barchani amaliy takliflar bilan faol ishtirok etishga chaqirdi.
Gavhar Alimova, Samarqand viloyati hokimi o‘rinbosari, viloyat Xotin-qizlar qo‘mitasi raisi, senator:
—Sog‘liqni saqlash va ta’lim sohalarida kadr yetishmovchiligi kuzatilmoqda. Ayniqsa, qishloq vrachlik punktlarida tibbiyot mutaxassislariga ehtiyoj seziladi. QVPlarda o‘smirlar terapevti, qizlar ginekologi, stomatolog shtatlarini joriy etish, yangi kadrlarni zamonaviy bilimlar bilan o‘qitish, mavjud kadrlarning esa malakasini oshirishga jiddiy e’tibor qaratish lozim. Advokatura instituti hanuzgacha oqsamoqda yoki kuchli advokatlar kam. Shuning uchun bu tizimni butkul isloh qilish kerak. Yoshlar kam bo‘lsa-da, jinoyat sodir etmoqda. Demak, maktablarda huquqiy bilim beradigan dars soatlarini ko‘paytirish zarur.
Viloyatlarda ayollarga nisbatan maishiy zo‘ravonlik holati kuzatilmoqda. Bunga chora ko‘rish kerak. Ayrim erkaklar birinchi xotinini urib, haydab yuborib, shar’iy nikoh orqali boshqasiga uylanmoqda. Jinoyat kodeksida bir tom ostida ikki xotinlikka javobgarlik belgilangan. Biroq Ma’muriy javobgarlik to‘g‘risidagi kodeksda bu holga aniq jazo yo‘q. Hududlarda ruhiyatida o‘zgarish bo‘lgan fuqarolar bor. Ularni tekshirish, davolash bo‘yicha sog‘liqni saqlash sohasida aniq mexanizm yo‘q. Ular ruhiy xasta emas. Ruhiy zo‘riqishga uchragan kishini davolasa bo‘ladi. Faqat buning uchun bizda psixolog, psixiatrlar yetishmaydi. Bundan tashqari, oxirgi vaqtda nogironlikning sabablari ilmiy tahlil etilmayapti. Ruhiyati buzilgan yigit va qiz turmush qurishi oqibatida imkoniyati cheklangan bolalar tug‘ilmoqda.
Yig‘ilishda faollar tomonidan sud tizimini yanada takomillashtirish taklifi bildirildi. Unga ko‘ra, tumanlararo sudlarni fuqarolik, jinoiy, iqtisodiy va ma’muriy ishlar bo‘yicha yagona odil sudlov organiga birlashtirib, Oliy sud bilan bir xil tizimdagi umumyurisdiksiya sudlarini yaratish lozim. Shuningdek, mamlakatda barcha tergov idoralarini birlashtirib, yagona – O‘zbekiston Respublikasi Tergov qo‘mitasini tashkil etish taklif qilindi. Bundan tashqari, sud tizimida inson omilini iloji boricha kamaytirish, uning ochiq va shaffofligini ta’minlamasdan turib sudlarni adolat qo‘rg‘oni sifatida shakllantirib bo‘lmasligi qayd etildi.
Izoh (0)