Ўзбекистон «Адолат» социал-демократик партиясининг дастури ва сайловолди дастури муҳокамасига бағишланган видеоселектор йиғилиш бўлиб ўтди. Бу ҳақда ЎзА хабар берди.
Йиғилишда партия сиёсий кенгаши раиси Наримон Умаров барчани амалий таклифлар билан фаол иштирок этишга чақирди.
Гавҳар Алимова, Самарқанд вилояти ҳокими ўринбосари, вилоят Хотин-қизлар қўмитаси раиси, сенатор:
—Соғлиқни сақлаш ва таълим соҳаларида кадр етишмовчилиги кузатилмоқда. Айниқса, қишлоқ врачлик пунктларида тиббиёт мутахассисларига эҳтиёж сезилади. ҚВПларда ўсмирлар терапевти, қизлар гинекологи, стоматолог штатларини жорий этиш, янги кадрларни замонавий билимлар билан ўқитиш, мавжуд кадрларнинг эса малакасини оширишга жиддий эътибор қаратиш лозим. Адвокатура институти ҳанузгача оқсамоқда ёки кучли адвокатлар кам. Шунинг учун бу тизимни буткул ислоҳ қилиш керак. Ёшлар кам бўлса-да, жиноят содир этмоқда. Демак, мактабларда ҳуқуқий билим берадиган дарс соатларини кўпайтириш зарур.
Вилоятларда аёлларга нисбатан маиший зўравонлик ҳолати кузатилмоқда. Бунга чора кўриш керак. Айрим эркаклар биринчи хотинини уриб, ҳайдаб юбориб, шаръий никоҳ орқали бошқасига уйланмоқда. Жиноят кодексида бир том остида икки хотинликка жавобгарлик белгиланган. Бироқ Маъмурий жавобгарлик тўғрисидаги кодексда бу ҳолга аниқ жазо йўқ. Ҳудудларда руҳиятида ўзгариш бўлган фуқаролар бор. Уларни текшириш, даволаш бўйича соғлиқни сақлаш соҳасида аниқ механизм йўқ. Улар руҳий хаста эмас. Руҳий зўриқишга учраган кишини даволаса бўлади. Фақат бунинг учун бизда психолог, психиатрлар етишмайди. Бундан ташқари, охирги вақтда ногиронликнинг сабаблари илмий таҳлил этилмаяпти. Руҳияти бузилган йигит ва қиз турмуш қуриши оқибатида имконияти чекланган болалар туғилмоқда.
Йиғилишда фаоллар томонидан суд тизимини янада такомиллаштириш таклифи билдирилди. Унга кўра, туманлараро судларни фуқаролик, жиноий, иқтисодий ва маъмурий ишлар бўйича ягона одил судлов органига бирлаштириб, Олий суд билан бир хил тизимдаги умумюрисдиксия судларини яратиш лозим. Шунингдек, мамлакатда барча тергов идораларини бирлаштириб, ягона – Ўзбекистон Республикаси Тергов қўмитасини ташкил этиш таклиф қилинди. Бундан ташқари, суд тизимида инсон омилини иложи борича камайтириш, унинг очиқ ва шаффофлигини таъминламасдан туриб судларни адолат қўрғони сифатида шакллантириб бўлмаслиги қайд этилди.
Изоҳ (0)