Avvalroq, Andijon viloyatiga yo‘lga chiqqan poyezd bir soat to‘xtab qolgani haqida xabar berilgandi. “O‘ztemiryo‘lyo‘lovchi” aksiyadorlik jamiyati bu holat yuzasidan izoh berdi va yo‘lovchilardan uzr so‘radi, deb xabar qiladi O‘zA.
“Yurtimizda issiq havo hukmronlik qilmoqda. Buning natijasida, 2019-yil 16-iyul kuni soat taxminan 18:00 da Toshkent—Andijon yo‘nalishida harakatlanuvchi 62-sonli yo‘lovchi poyezdi elektrovozining elektr quvvatida uzilish kuzatildi. Natijada mazkur poyezd Kuchluk— To‘ytepa peregonining 36 kilometr 5-piketida to‘xtab qoldi”, — deyiladi xabarda.
Qayd etilishicha, ko‘rilgan chora tadbirlar natijasida texnik nosozlik 1 soat ichida bartaraf qilingan hamda poyezd harakati yana yo‘lga qo‘yilgan.
Xabarda berilgan ma’lumotga qaraganda, elektr tizimida uzilish bo‘lganda vagondagi konditsionerlar ishlamasligi hamda kunning issiqligi inobatga olinib, poyezd to‘xtagan vaqtida vagon eshiklari ochilib shamollatib turilgan hamda yo‘lovchilarga bepul salqin ichimliklar tarqatilgan.
“O‘ztemiryo‘lyo‘lovchi” aksiyadorlik jamiyati ma’muriyati barcha yo‘lovchilardan bugungi yuzaga kelgan noqulaylik uchun uzr so‘raydi”, — deyiladi izohda.
Izoh (0)