Xalqaro press-klubning “Ish haqi, pensiyalar, stipendiyalar va nafaqalar miqdorini oshirish to‘g‘risida”gi Prezident farmoni mazmun-mohiyatiga bag‘ishlangan sessiyasida Xalq ta’limi vaziri o‘rinbosari Temurjon Komilov o‘qituvchilarning oylik maoshi haqida ma’lumot berdi.
Yaqin yillarga qadar o‘qituvchining oyligi kam bo‘lgan, natijada pedagoglarning maqomi ham tushib ketgan edi. Bugun bu holat ijobiy tomonga o‘zgarmoqda.
Xalqaro press-klubda ta’kidlanganidek, 2016-yil yakunida birinchi toifali o‘qituvchi 930 ming so‘m, direktor jamg‘armasi tomonidan to‘lanadigan rag‘batlantiruvchi mukofot va boshqa ustamalar bilan qo‘shganda qo‘liga 1,2 million so‘mga yaqin pul olar edi. Joriy yildan bu toifadagi o‘qituvchilar soliqlardan tashqari barcha ustamalar bilan 2,6 million so‘m atrofida oylik olmoqda.
Prezident farmoni hamda oldindan rejalashtirilgan tartibga ko‘ra, o‘qituvchilarning oylik maoshlari ham oshadi. Endilikda oliy toifali o‘qituvchilar uchun barcha ustamalar bilan hisoblangan oylik maosh 3,2 million so‘mgachani, ularning qo‘liga tegadigani esa 2,9 million so‘mgachani tashkil etadi.
Izoh (0)