Joriy yil 9-iyul kuni Bloomberg xalqaro axborot kanali tomonidan Sankt-Peterburg shahrida o‘tkazilgan Xalqaro moliya kongressi doirasida O‘zbekiston Markaziy banki raisi intervyusi asosida “Joriy yilda O‘zbekiston qo‘shimcha yevroobligatsiyalar chiqarishi mumkin” nomidagi maqola chop etildi. Bu haqda Markaziy bank matbuot xizmati ma’lum qildi.
Intervyu davomida joriy yilda tijorat banklari tomonidan xalqaro obligatsiyalarni chiqarilishi mumkinligi qayd etilgan.
Markaziy bank ushbu bildirilgan fikrlarni talqin etish va iqtibos keltirishda suveren va korporativ xalqaro obligatsiyalarning farqiga e’tibor qaratish lozimligini ta’kidlaydi.
Ushbu masalani ommaviy axborot vositalari va xalqaro investorlar tomonidan noto‘g‘ri talqin qilinishini oldini olish maqsadida Moliya vazirligi 2019-yilda O‘zbekiston Respublikasining suveren obligatsiyalarini qo‘shimcha chiqarilishi rejalashtirilmayotganligini rasman qayd etadi.
O‘zbekiston Respublikasining kelgusida muomalaga chiqariladigan suveren xalqaro obligatsiyalarining muddati va hajmlari mamlakat hukumati tomonidan makroiqtisodiy siyosatning ustuvor yo‘nalishlari hamda jahon kapital bozorlarida shakllanayotgan holatdan kelib chiqib belgilanadi.
Izoh (0)