O‘zbekiston Respublikasi IIV YHXBB matbuot xizmati O‘zbekistonda bodi-kameralar 1-yanvardan ishlashini “Daryo”ga ma’lum qildi. Xabarnomani to‘lig‘icha keltirib o‘tamiz.
Kuni kecha biz O‘zbekiston Respublikasi Vazirlar Mahkamasi yo‘l harakati xavfsizligini ta’minlash yo‘nalishidagi ishlar samaradorligi oshirish maqsadida “Yo‘l-patrul xizmati xodimlarining yo‘l harakati qatnashchilari bilan o‘zaro munosabatlari hamda maxsus moslamalardan foydalanishi tartibi to‘g‘risida”gi qarori va uning ijrosi to‘g‘risida o‘z munosabatimizni bildirib, turli ijtimoiy tarmoqlarda chiqish qilgan edik. Ushbu xabarimizda O‘zbekiston Respublikasi Vazirlar Mahkamasiga bodi-kameralarni ishga tushirish muddatlarini uzaytirish bo‘yicha taklif berilganligi, kameralar butunlay bekor qilinmaganligi, faqatgina uning ishga tushirish muddatlarini uzaytirish rejalashtirilganligi aytilgan edi.
Mana bugun O‘zbekiston Respublikasi Vazirlar Mahkamasi mazkur masalaga oid barcha ma’lumotlarni o‘rganib chiqib o‘zining yangi “Ichki ishlar organlari xodimlarini mobil videokuzatuv vositalari bilan ta’minlash bo‘yicha qo‘shimcha chora-tadbirlar to‘g‘risida”gi 556-sonli qarorini chiqardi.
Mazkur qaror talablariga ko‘ra yo‘l patrul xizmati inspektorlarini bodi-kameralar bilan ta’minlash hamda ularni ishga tushirish muddati 2020-yilning 1-yanvariga qadar uzaytirildi.
Ta’kidlab o‘tish lozimki O‘zbekiston Respublikasi Prezidentining “Jamoat xavfsizligini ta’minlash samaradorligini oshirish bo‘yicha qo‘shimcha chora-tadbirlar to‘g‘risida”gi 4075-sonli qarorida aynan shu yo‘nalishda amalga oshirilishi lozim bo‘lgan vazifalar hamda ularning ijrochilari, bu ishga mas’ullar, bajarish muddatlari belgilab berilgan. Qaror ijrosi bo‘yicha juda ko‘plab ishlar amalga oshirildi. Bodi-kameralar xarid qilinadigan tashkilot aniq bo‘ldi. Endi butun diqqat-e’tibor ma’lumotlarni saqlash qurilmalarini xarid qilish, dasturiy ta’minotni ishlab chiqishga qaratilgan. Bu vazifaning ham asosiy qismi bajarilgan. Ertaga yo‘llarda turli kelishmovchiliklar va ziddiyatlar, bahs-munozaralar kelib chiqmasligi aynan mana shu dasturiy ta’minotni to‘g‘ri va aniq ishlashiga ko‘p jihatdan bog‘liq.
Kezi kelganida shuni ham aytib o‘tish lozimki, har bir harakat ishtirokchisi yo‘l harakati qoidalarini puxta o‘rganib, harakatlanish xavfsizligini ta’minlashga o‘z xissasini qo‘shadigan bo‘lsa, bu faqat foyda keltiradi. Shu sababli biz harakat ishtirokchilaridan ortiqcha ehtiroslarga berilmasdan qoidalar talablarini bajarishlarini so‘rab qolgan bo‘lardik. Yo‘llar faqat ezgu maqsadlar sari eltsin.
Izoh (0)