Ўзбекистон Республикаси ИИВ ЙҲХББ матбуот хизмати Ўзбекистонда боди-камералар 1 январдан ишлашини «Дарё»га маълум қилди. Хабарномани тўлиғича келтириб ўтамиз.
Куни кеча биз Ўзбекистон Республикаси Вазирлар Маҳкамаси йўл ҳаракати хавфсизлигини таъминлаш йўналишидаги ишлар самарадорлиги ошириш мақсадида «Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиши тартиби тўғрисида»ги қарори ва унинг ижроси тўғрисида ўз муносабатимизни билдириб, турли ижтимоий тармоқларда чиқиш қилган эдик. Ушбу хабаримизда Ўзбекистон Республикаси Вазирлар Маҳкамасига боди-камераларни ишга тушириш муддатларини узайтириш бўйича таклиф берилганлиги, камералар бутунлай бекор қилинмаганлиги, фақатгина унинг ишга тушириш муддатларини узайтириш режалаштирилганлиги айтилган эди.
Мана бугун Ўзбекистон Республикаси Вазирлар Маҳкамаси мазкур масалага оид барча маълумотларни ўрганиб чиқиб ўзининг янги «Ички ишлар органлари ходимларини мобил видеокузатув воситалари билан таъминлаш бўйича қўшимча чора-тадбирлар тўғрисида»ги 556-сонли қарорини чиқарди.
Мазкур қарор талабларига кўра йўл патруль хизмати инспекторларини боди-камералар билан таъминлаш ҳамда уларни ишга тушириш муддати 2020 йилнинг 1 январига қадар узайтирилди.
Таъкидлаб ўтиш лозимки Ўзбекистон Республикаси Президентининг «Жамоат хавфсизлигини таъминлаш самарадорлигини ошириш бўйича қўшимча чора-тадбирлар тўғрисида»ги 4075-сонли қарорида айнан шу йўналишда амалга оширилиши лозим бўлган вазифалар ҳамда уларнинг ижрочилари, бу ишга масъуллар, бажариш муддатлари белгилаб берилган. Қарор ижроси бўйича жуда кўплаб ишлар амалга оширилди. Боди-камералар харид қилинадиган ташкилот аниқ бўлди. Энди бутун диққат-эътибор маълумотларни сақлаш қурилмаларини харид қилиш, дастурий таъминотни ишлаб чиқишга қаратилган. Бу вазифанинг ҳам асосий қисми бажарилган. Эртага йўлларда турли келишмовчиликлар ва зиддиятлар, баҳс-мунозаралар келиб чиқмаслиги айнан мана шу дастурий таъминотни тўғри ва аниқ ишлашига кўп жиҳатдан боғлиқ.
Кези келганида шуни ҳам айтиб ўтиш лозимки, ҳар бир ҳаракат иштирокчиси йўл ҳаракати қоидаларини пухта ўрганиб, ҳаракатланиш хавфсизлигини таъминлашга ўз хиссасини қўшадиган бўлса, бу фақат фойда келтиради. Шу сабабли биз ҳаракат иштирокчиларидан ортиқча эҳтиросларга берилмасдан қоидалар талабларини бажаришларини сўраб қолган бўлардик. Йўллар фақат эзгу мақсадлар сари элтсин.
Изоҳ (0)