Prokuratura va Mehnat vazirligi tekshiruvlari natijalariga ko‘ra, Toshkent viloyati elektr tarmoq xodimlari transport qantovi faol bo‘lgan trassada bir necha marta tozalash ishlariga jalb etilgani aniqlandi. “Nuz.uz”ning xabar berishicha, korxona rahbari ma’muriy javobgarlikka tortilgan.
Ma’lum bo‘lishicha, xodimlar tozalash ishlarini korxona hududida emas, undan 10—15 daqiqa piyoda yurishlik uzoqlikda, transport qantovi faol bo‘lgan trassada olib borgan bo‘lib, ulardan birini mashina urib ketishiga sal qolgan.
Shuningdek, xabarda aytilishicha, rahbariyat xodimlarga tazyiq o‘tkazgan va ishdan bo‘shatib yuborish bilan tahdid qilib, tozalash ishlariga o‘z xohishiga ko‘ra chiqqani va faqat korxona hududida ishlagani haqida tilxat yozishga majbur qilgan.
Prokuratura va Mehnat vazirligi tomonidan olib borilgan tekshiruv natijalariga ko‘ra, “Toshkent viloyati elektr tarmoqlari korxonasi” AJ rahbari S.Yusupov Mehnat kodeksining 7-moddasi va va Vazirlar Mahkamasining 349-sonli qarori talablarini buzgan holda korxona xodimlarini avtomobil yo‘li yonidagi yerlarni obodonlashtirish ishlariga jalb etgani aniqlangan.
Toshkent viloyati Davlat mehnat inspeksiyasining qaroriga ko‘ra, korxona rahbari S. Yusupov eng kam oylik ish haqining 1 baravaridan 3 baravarigacha jarima belgilangan Ma’muriy javobgarlik to‘g‘risidagi kodeksning 51-moddasi 1-qismi bilan javobgarlikka tortilgan. Korxona rahbari aynan qancha jarima to‘lagani ma’lum qilinmagan.
Izoh (0)