Жанубий Кореяда 20 июндан 25 июнга қадар Корея Ихтирочи аёллари ассоциацияси (KWIA), Корея Интеллектуал мулк оффиси (KIPO) ва Халқаро интеллектуал мулк ташкилоти (WIPO) томонидан XII Корея Халқаро Ихтирочи аёллар кўргазмаси — KIWIE 2019 ўтказилмоқда. Бу ҳақда Хотин-қизлар қўмитаси матбуот хизмати маълум қилди.
KIWIE 2019 кўргазмасида 30 дан зиёд давлатлардан 400 нафардан ортиқ ихтирочи хотин-қиз техника, технология, тиббиёт, озиқ-овқат, енгил саноат, кимё ва саноатнинг турли йўналишлари бўйича ўз ихтиролари ҳамда инновацион ишланмалари билан қатнашмоқда.
Ўзбекистон Хотин-қизлар қўмитаси томонидан 12 нафар иқтидорли хотин-қизлар ҳам 20—23 июнь кунлари ўтказиладиган халқаро кўргазма ва форумда қатнашиш ҳамда 24—25 июнь кунлари Ихтирочи аёллар академиясида ўтказиладиган ўқув курсларида ўз малакаларини оширишлари учун юборилган эди.
Улар эришган натижалари ва ишлаб чиқараётган маҳсулотларини намойиш қилди ва халқаро экспертлар томонидан ўрганилиб, юқори баҳоланди.
Ўзбекистон Хотин-қизлар қўмитаси бўлим бошлиғи, профессор Карима Норқулованинг «Энергия тежамкор қуритиш қурилмаси» номли ихтироси KIWIE 2019’нинг техника-технология йўналиши бўйича махсус соврин — Гран-при соҳибаси ҳамда Sky Beauty компанияси раҳбари Абдуллаева Назокат томонидан яратилган «Зайтун ёғи асосида ишлаб чиқилган органик совун» косметика йўналиши бўйича махсус соврин — Гран-при соҳиби бўлди.
Шунингдек Ўзбекистон делегацияси аъзолари 5 та олтин, 2 та кумуш ва 6 та бронза медалларини ҳам қўлга киритди.
Изоҳ (0)