Bo‘ka tumanida “Sog‘lom hayotga qadam tashla” aksiyasi doirasida “Salomatlik kuni” ommaviy tadbirlari o‘tkazildi. Bu haqda “Daryo”ga Sog‘liqni saqlash vazirligi matbuot xizmati ma’lum qildi.
Tumandagi Bo‘ston qishlog‘ida ertalabki badantarbiya o‘tkazilib, unda va hududga yaqin qishloqlar aholisi tomonidan stadionda mashqlar bajarildi, qishloqqa kirish yo‘lagi bo‘ylab 5 kilometr masofaga faol yurish tadbiri bo‘lib o‘tdi.
Shuningdek, tumandagi 7-oilaviy poliklinika oldida “Salomatlik maydonchasi” va “Sog‘lom ovqatlanish yarmarkasi” tashkil qilindi. Yuqumli bo‘lmagan kasalliklar profilaktikasi, sog‘lom ovqatlanish va jismoniy faollikni ahamiyati xaqida ma’lumotlar berildi. Ushbu tadbirlar o‘ziga hos saylga aylanib ketdi.
Bundan tashqari, tuman markaziy stadionida Sog‘liqni saqlash vazirligi va tuman tashkilotlari xodimlari, sport maktablari, kollej o‘quvchilari va aholi ishtirokida gimnastika mashqlari bajarilib, bu yerda ham 5 kilometrga faol yurish amalga oshirildi. Ushbu stadion yonida joylashgan eko-parkda kattalar va bolalar tomonidan velosayr, sport hamda musiqa maktablari o‘quvchilarining badiiy chiqishlari yig‘ilganlarda katta taassurot qoldirdi.
E’tiborli jihati, tumanda joylashgan 15-mehribonlik uyining 127 nafar tarbiyalanuvchisi ham gimnastika mashqlarini bajardi. Tarbiyalanuvchilarning ko‘rgazmali chiqishlari, “Sog‘lom ovqatlanish yarmarkasi”, “Biz tamakisiz hayot uchun ovoz beramiz” tadbirlari tashkil etildi. Tuman madaniyat bo‘limining xayriya konserti hamda homiylar tomonidan esdalik sovg‘alarining ulashilishi ularning quvonchiga sabab bo‘ldi.
“Sog‘lom hayotga qadam tashla” aksiyasi doirasidagi ommaviy tadbirlar mamlakat bo‘ylab barcha hududlarda aholining faol ishtiroki ta’minlangan holda ko‘tarinki kayfiyatda tashkil etildi.
Izoh (0)