10-iyun kuni Axborot va ommaviy kommunikatsiyalar agentligida Ichki ishlar vazirligi rahbar xodimlari ishtirokida matbuot anjumani bo‘lib o‘tgan edi. Vazirlik matbuot xizmati ayrim journalist va blogerlarni matbuot anjumanida berilgan javoblarni noto‘g‘ri talqin qilganlikda aybladi.
“Ba’zi elektron ommaviy axborot vositalari vakillari o‘zlari bergan savollarga qaytarilgan javoblarni noto‘g‘ri talqin qilib, ijtimoiy tarmoqlardagi o‘z manbalarida tarqatgan. Ba’zi bir elektron ommaviy axborot vositalari ham ushbu noto‘g‘ri talqin qilingan javoblarni ko‘chirib, o‘z manbalarida e’lon qilgan. Bu esa o‘z navbatida manbadan foydalanuvchilarni chalg‘itishga, qonunchilikni noto‘g‘ri tushunishga olib keladil, — deyiladi xabarda.
Muloqotda ishtirok etgan jurnalistlardan birining “Ma’lumki, Toshkent shahrida propiska tartibini buzgan viloyatliklar jarimaga tortiladi. Xuddi shu qoida boshqa viloyatlarga borgan toshkentliklar uchun ham qo‘llaniladimi?” degan savoliga, Badriddin Shorixsiyev tomonidan qaytarilgan javob noto‘g‘ri talqin qilingan.
Javobda, Toshkent shahri va Toshkent viloyatida doimiy propiska qilish alohida tartib asosida amalga oshirilishi, boshqa viloyatlarda doimiy propiska qilishda muammolar yo‘qligi nazarda tutilgan.
Ma’lumki, O‘zbekiston Respublikasi Ma’muriy javobgarlik to‘g‘risidagi kodeksning 223-moddasida, (Pasport tizimi qoidalarini buzish) pasporti bo‘lishi shart bo‘lgan fuqaroning pasportsiz yoki haqiqiy bo‘lmagan pasport bilan, vaqtincha yoki doimiy propiskasiz yoxud turgan joyi bo‘yicha hisobda turmasdan yashashi, pasportni qasddan yaroqsizlantirishi, shuningdek pasportni beparvolik bilan saqlashi va buning oqibatida pasportning yo‘qolishi — eng kam ish haqining ikkidan bir qismidan uch baravarigacha miqdorda jarima solishga sabab bo‘ladi, deb qayd etilgan.
Kodeksning ushbu moddasi, O‘zbekiston Respublikasining barcha fuqarolariga shu jumladan, Toshkent shahrida doimiy propiskada turgan fuqarolarga tegishli bo‘lib, ular ham pasport tizimi qoidalariga amal qilishga majburdirlar.
“Matbuot anjumanida ishtirok etib, savollar berayotgan OAV vakillariga qarata shuni aytish lozimki, savol berishdan oldin matbuot anjumani mavzusi bilan tanishib, savollarni mavzu doirasida bersalar. Chunki, ichki ishlar organlarining sohaviy xizmatlari ko‘p tarmoqli bo‘lganligi sababli, matbuot anjumaniga mavzuga oid tegishli mutaxassislar taklif etiladi.
Agar OAV vakillari bergan savollariga olgan javoblarini tushunmasalar, o‘zlaricha sharhlamasliklari kerak. Ularning o‘z tushunchalarida talqin qilgan xabarlari manba foydalanuvchilarini chalg‘itishga olib keladi. Shuningdek, matbuot anjumanida ishtirok etgan ayrim ommaviy axborot vositalari vakillari va blogerlar atrofdagilarni hurmat qilgan holda oddiy odob-ahloq normalariga (behurmatlik bilan saqich chaynash, boshqalarga nisbatan hurmatsizlik bilan o‘tirish...) rioya qilsalar, o‘zlarining yuksak madaniyat sohibi ekanliklarini namoyon qilgan bo‘ladilar.
Albatta, har bir o‘zkazilayotgan tadbirlar barcha uchun foydali bo‘lishi va xalqimiz manfaati uchun xizmat qilishi zarur. Ba’zi bir OAVlarining noto‘g‘ri talqin qilib, o‘z manfaatlarini o‘ylab, boshqalar sha’nini yerga urib tarqatgan mantiqsiz xabarlari go‘yoki ularning foydalanuvchilari sonini ortirib, obro‘larini oshib yuboradi.
O‘ylaymizki, tegishli jurnalist va blogerlar o‘zlariga to‘g‘ri xulosa chiqaradi”, — deyiladi xabarda.
Izoh (0)