Andijonda muddatli harbiy xizmatchilar qasamyod qabul qildi (foto)
Kuni kecha Favqulodda vaziyatlar vazirligiga qarashli harbiy qismlarda Qurolli Kuchlar safiga chaqirilib, zimmalaridagi yuksak burchlarini ado etayotgan muddatli harbiy xizmatchilar chin yigitlik ontini aytib, Harbiy qasamyod qabul qildi. Bu haqda Favqulodda vaziyatlar vazirligi matbuot xizmati “Daryo”ga xabar berdi.
Andijon shahrining qoq markazida bunyod etilgan muhtasham obida – Zahiriddin Muhammad Bobur haykali poyida polkovnik Nurmuhammad Saidov komandirlik qilayotgan muddatli harbiy xizmatni o‘tayotgan askarlar o‘z Vataniga, xalqiga va Prezidentiga sadoqatlarini izhor etdi.
Bugun islohotlar samarasi o‘laroq, mazkur tadbir harbiy qism va muassasalarda keng jamoatchilik ishtirokida tantanali tarzda o‘tkazilmoqda. Aziz farzandlarining unutilmas kunida quvonchiga sherik bo‘lish uchun ota-onalar hamda do‘st-u yaqinlar shodiyonaga taklif etilyapti. Bu milliy mentalitetga xos bo‘lgan bardavom qadriyatlar, xalq va armiya yakdilligining yaqqol tasdig‘idir.
– Qalbim faxrga to‘lib, g‘ururlanib turibman, – deydi askar onasi Nigora Solihova. – Saf tortib turgan norg‘ul yigitlar orasida mening ham farzandim borligi ko‘ksimni iftixorga to‘ldirmoqda. Qarang, harbiy libos farzandlarimizga yanada ko‘rk, salobat baxsh etibdi. O‘g‘lim bilan suhbatlashdim. Garchi oradan endigina bir oydan oshiqroq vaqt o‘tgan bo‘lsa-da, nazarimda u ancha ulg‘aygandek. Muhtasham Zahiriddin Muhammad Bobur majmuasi poyida Harbiy qasamyod qabul qilgan o‘g‘limning ahdiga sodiq qolishiga, Vatan olidagi burchini namunali o‘tab, yuzimizni yorug‘ qilishiga ishonaman.
Harbiy qasamyod qilgan askarlarni Favqulodda vaziyatlar vazirligi rahbariyati, viloyat xokimligi, Mudofaa vazirligi huzuridagi Jamoatchilik kengashi a’zolari, faxriylar hamda ota-onalar so‘zga chiqib tabrikladi. O‘g‘lonlarning hamisha qasamyodiga sodiq bo‘lib qolishlarini, bildirilgan ishonchni munosib xizmatlari bilan oqlashlarini tiladi.
