Shahrisabzlik Intizor Muhiddinova tilanchilik bilan shug‘ullanishni o‘ziga odat qilgan bo‘lib, ba’zida soddadil odamlarni chuv ham tushirgan. Bu haqda O‘zA xabar bermoqda.
U ikki marta firibgarlik va o‘g‘rilik moddasi bilan sudlanib, sud hukmi bilan tegishli jazo tayinlangan bo‘lsa-da, bundan xulosa chiqarmadi. Intizor Farg‘ona viloyatiga o‘g‘li bilan kelib, sadaqa yig‘ish bilan shug‘ullandi.
O‘rgangan ko‘ngil o‘rtansa qo‘ymas, deganlaridek, u yana jinoyatga qo‘l urdi. Joriy yilning 12-fevral kuni Farg‘ona tumanining Pastki archa mahalla fuqarolar yig‘inidagi uyga sadaqa so‘rab kiradi. Bu uyda yashovchi ayol bilan gaplashib, uning soddaligini darrov payqaydi. I. Muhiddinova darrov vaziyatdan foydalanib, xonadon egasini avrashga tushadi. Unga ikki nafar ayollar dushmanlik qilayotganligi, uyiga jasad ko‘milganligi, shuning uchun uyida baraka yo‘qligini aytib, dam solish orqali ushbu dushmanlarning ilmu-amallari, sehrini yo‘qotib berishini aytadi.
Bu gaplarga uy egasi chippa-chin ishonadi. Intizorning asosiy maqsadi esa uydagi qimmatbaho narsalarni egallash edi. U sodda ayolni turli uydirmalar bilan qo‘rqitib, bir dona bahosi 300 ming so‘mlik telefon apparati, bir juft bahosi 400 ming so‘mlik va yana bir dona bahosi 200 ming so‘mlik tilla sirg‘asini firibgarlik yo‘li bilan qo‘lga kiritib, voqea joyidan yashiringan. Ichki ishlar idoralari xodimlari tomonidan qidiruv jarayonida bu ayol qo‘lga olindi.
Jinoyat ishlari bo‘yicha Farg‘ona tumani sudi tomonidan I. Muhiddinovaning jinoyat ishi ko‘rib chiqilib, unga tegishli jazo tayinlandi.
Izoh (0)