Куни кеча Фавқулодда вазиятлар вазирлигига қарашли ҳарбий қисмларда Қуролли Кучлар сафига чақирилиб, зиммаларидаги юксак бурчларини адо этаётган муддатли ҳарбий хизматчилар чин йигитлик онтини айтиб, Ҳарбий қасамёд қабул қилди. Бу ҳақда Фавқулодда вазиятлар вазирлиги матбуот хизмати «Дарё»га хабар берди.
Андижон шаҳрининг қоқ марказида бунёд этилган муҳташам обида – Заҳириддин Муҳаммад Бобур ҳайкали пойида полковник Нурмуҳаммад Саидов командирлик қилаётган муддатли ҳарбий хизматни ўтаётган аскарлар ўз Ватанига, халқига ва Президентига садоқатларини изҳор этди.
Бугун ислоҳотлар самараси ўлароқ, мазкур тадбир ҳарбий қисм ва муассасаларда кенг жамоатчилик иштирокида тантанали тарзда ўтказилмоқда. Азиз фарзандларининг унутилмас кунида қувончига шерик бўлиш учун ота-оналар ҳамда дўст-у яқинлар шодиёнага таклиф этиляпти. Бу миллий менталитетга хос бўлган бардавом қадриятлар, халқ ва армия якдиллигининг яққол тасдиғидир.
– Қалбим фахрга тўлиб, ғурурланиб турибман, – дейди аскар онаси Нигора Солиҳова. – Саф тортиб турган норғул йигитлар орасида менинг ҳам фарзандим борлиги кўксимни ифтихорга тўлдирмоқда. Қаранг, ҳарбий либос фарзандларимизга янада кўрк, салобат бахш этибди. Ўғлим билан суҳбатлашдим. Гарчи орадан эндигина бир ойдан ошиқроқ вақт ўтган бўлса-да, назаримда у анча улғайгандек. Муҳташам Заҳириддин Муҳаммад Бобур мажмуаси пойида Ҳарбий қасамёд қабул қилган ўғлимнинг аҳдига содиқ қолишига, Ватан олидаги бурчини намунали ўтаб, юзимизни ёруғ қилишига ишонаман.
Ҳарбий қасамёд қилган аскарларни Фавқулодда вазиятлар вазирлиги раҳбарияти, вилоят хокимлиги, Мудофаа вазирлиги ҳузуридаги Жамоатчилик кенгаши аъзолари, фахрийлар ҳамда ота-оналар сўзга чиқиб табриклади. Ўғлонларнинг ҳамиша қасамёдига содиқ бўлиб қолишларини, билдирилган ишончни муносиб хизматлари билан оқлашларини тилади.
Изоҳ (0)