2019-yilning o‘tgan davri mobaynida Qashqadaryoda inson o‘limi bilan yakunlangan 29 ta yo‘l-transport hodisasi sodir etilgan bo‘lib, oqibatda 30 kishi bevaqt hayotdan ko‘z yumgan. Bu haqda Qashqadaryo viloyati Yo‘l harakati xavfsizligi boshqarmasi boshlig‘ining Yakkabog‘ tumanidagi “Jiyda” qishlog‘i aholisi bilan bo‘lgan muloqotida ishtirok etgan “Daryo” muxbiri ma’lum qilmoqda.
YTHlarning 3 tasi Yakkabog‘ tumani hududida ro‘y bergan bo‘lib, natijada 4 nafar fuqaro vafot etgan.
Viloyat YHXB boshlig‘i va aholi o‘rtasidagi muloqotda ma’lum qilinishicha, joriy yilning 24-mart kuni soat 01:40 da “Jiyda” qishlog‘i hududida 1996-yilda tug‘ilgan “Kalta” qishlog‘ida yashovchi Toshkent axborot texnologiyalari universiteti talabasi R.I. boshqaruvchidagi Nexia avval o‘ziga qarama-qarshi tomondan kelayotgan Nexia’ga, so‘ngra yo‘l chetida turgan Damas’ga urilib, yo‘lni kesib o‘tayotgan 2 nafar fuqaroni urib yuborgan. Natijada 1985-yilda tug‘ilgan I.Sh. hamda T.A.lar voqea joyida vafot etgan. Viloyat IIB matbuot xizmati ma’lumotiga ko‘ra, mazkur holat yuzasidan haydovchi R.I.ga nisbatan Jinoyat kodeksining 266-moddasi 3-qismi “a” bandi (Transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bilan jinoyat ishi qo‘zg‘atilib, tergov-surishtiruv jarayonlari boshlab yuborilgan.
— Jiyda qishlog‘ida sodir etilgan YTH tumanda inson o‘limi bilan yakunlangan 3-yo‘l-transport hodisasi hisoblanadi, — deydi Qashqadaryo viloyat Yo‘l harakati xavfsizligi boshqarmasi boshlig‘i Erkin Qurbonov. – Eng achinarlisi ushbu hodisa oqibatida 2 ta xonadon yaqin kishilaridan ayrildi. Endigina 23 yoshni qarshilagan haydovchi yigit esa endi umrining eng gullagan chog‘ini qamoqda o‘tkazishga mahkum. Shuning uchun ham ota-onlarimizdan, jamoatchilikdan ogohlikni talab qilayapmiz. Birgina biz emas, barchamiz yo‘ldagi ko‘ngilsiz holatlarning oldini olishga mas’ulmiz. Boisi, har qanday ko‘ngilsiz holat siz va bizning hayotimizga xavf solishi mumkin.
Yig‘ilishda so‘z olgan qishloq aholisi hudud profilaktika inspektorini hatto tanimasligi va xodim ish faoliyatidan norozi ekanligini bildirdi. Aholi e’tiroziga javoban holatni tumandagi mavjud 59 ta mahallada 47 nafar profilaktika inspektori faoliyat yuritishini va bitta inspektor ba’zan 2 ta mahallaga javobgar hisoblanishi bilan izohlagan IIB boshlig‘i Sherzod Shokirovning gapini bo‘lgan tuman hokimi Shomurod Donayev xodim o‘z ishiga mas’uliyat bilan yondashmaganligini bildirib, tuman IIB boshlig‘iga xodim bilan ko‘proq ishlash lozimligini aytdi.
Davra suhbati so‘ngida tuman yo‘l inspektorlari “reyd”ida mast holatda avtomobil boshqarganligi aniqlangan 4 nafar fuqaro ustidan sayyor sud majlisi ham bo‘lib o‘tdi. Sayyor sud yakuniga ko‘ra, 2 nafar ayblanuvchiga 15 sutkalik qamoq jazosi tayinlangan bo‘lsa, 1 nafar fuqaroga eng kam ish haqining 25 baravari miqdorida jarima jazosi qo‘llanildi. 1 nafar fuqaro sudi esa keyin ko‘rib chiqish uchun qoldirildi.
Izoh (0)