Пастдарғом туманидаги «Ўзбекистон мустақиллиги 10 йиллиги» муқобил машина трактор парки (ММТП) ҳудудида (Шомбулоқ қишлоғи жойлашган) балиқчиликка ихтисослаштирилган фермер хўжаликларига туман ҳокимининг топшириғига кўра сув бериш тўхтатилган.
Мазкур ҳудуддаги фермер хўжалиги раҳбарларининг «Дарё»га маълум қилишича, балиқхоналарга сув берилмаганига бир ой бўлган.
Айни пайтда бу ерда «Зар-Кам-Рус барака боғи», «Шомбулоқ сазам балиқлари», «Анҳор-сув», «Пастдарғом балиқ хавзаси», «Шомбулоқ амурлари» фермер хўжаликлари фаолият юритмоқда.
— 9 йилдан буён балиқчилик билан шуғулланаман. Шу вақтга қадар сув масаласида ҳеч қандай муаммо бўлмаган. Бироқ сўнгги бир ойдан бери бизга сув бермаяпти, — дейди «Шомбулоқ сазам балиқлари» фермер хўжалиги раиси Александр Якубов. — Бир-икки кунда човоқ ташламасак бу йил ҳеч қандай балиқ етиштира олмаймиз. Ҳар бир кун биз учун ғанимат.
Балиқчилик билан шуғулланувчи фермер хўжалиги раҳбарларининг маълум қилишича, улар бир йилда 500 тонна балиқ етиштириб чиқараркан.
«Дарё» мухбири мазкур ҳолат юзасидан журналистик суриштирув олиб бормоқда.
Изоҳ (0)