Qo‘qon shahar hokimi Ma’rufjon Usmonov Yevropa ittifoqi moliyaviy ko‘magida UzWaterAware loyihasi doirasida o‘tkazilayotgan ekomarafonda taniqli teatr aktyorlari bilan birga ko‘chat ekdi. Bu haqda “Daryo” muxbiri xabar berdi.
– Bugungi ekomarafon davomida ikki mingdan ortiq ko‘chat ekilishi rejalashtirilgan. Bundan tashqari, har bir qo‘qonlik oila bittadan manzarali daraxt ko‘chati ekishi kerak. Shunda Qo‘qon bog‘ ichidagi shaharga aylanadi. Ko‘rkam va bahavo shahrimizda bir marta mehmon bo‘lgan odam yana qaytib kelishga harakat qilsin, – deydi Ma’rufjon Usmonov.
Markaziy Osiyo mintaqaviy ekologiya markazi tomonidan Suv xo‘jaligi vazirligi, Ekologiya qo‘mitasi va Qo‘qon shahar hokimligi bilan hamkorlikda o‘tkazilayotgan ekomarafon 27-mart kunigacha davom etadi. Marafon doirasida Qo‘qon shahrining markaziy ko‘chalarida o‘quv marafoni tashkil etilib, suv tejovchi texnologiyalar yordamida ko‘chatlar ekiladi. Qo‘qon davlat pedagogika instituti va umumta’lim maktablarida eko-darslar o‘tkaziladi.
Izoh (0)