Turizmni rivojlantirish davlat qo‘mitasi tomonidan tashkil etilgan info-tur ishtirokchilarining ikkinchi kundagi dastlabki manzili Urganch tumanidagi “Ulli hovli” majmuasida bo‘ldi, deb xabar berdi “Xalq so‘zi Online”.
“Ulli hovli” turkman millatiga mansub aholi yashagan hududdagi eng katta hovli-joy bo‘lgan. Shu bois unga “ulli”, ya’ni katta sifati berilgan.
“Ulli hovli”ga kiraverishdagi qadimiy darvoza va devorga shunday yozuvlar bitilgan: “Ushbu muborak ulli hovli Xorazmshoh Abulg‘ozi Bahodirxon tomonidan Soler turkmanlarining oqsoqollari Xo‘jamberdi va Shermamatboy iltimosiga ko‘ra bunyod qilingan. Bunyod qilingan sanasi 1694-yil”.
Ushbu tarixiy maskan Prezident Shavkat Mirziyoyev tashabbusi bilan 2017—2018-yillarda qayta ta’mirlanib, asl holiga keltirildi. Natijada u o‘zbekistonliklar va xorijlik sayyohlarning eng sevimli maskanlaridan biriga aylandi.
“Buni qarangki, majmuaga hovli qurilishi tashabbuskorlaridan biri bo‘lgan Shermamatboyning yettinchi avlodi Davlatnazar Rajabov rahbarlik qilmoqda”, — deyiladi xabarda.
“Bilasizmi, bu imoratlar poydevorsiz qurilgan, ya’ni devorlarning osti bir metr kavlanib, qum solingan va ustiga qamish to‘shalib, so‘ng paxsa urilgan. Devorlar nuramasdan o‘z holicha saqlanishida ota-bobolarimiz qo‘llagan bu texnologiyaning xizmati katta. Biz unga hech qanday o‘zgartirish kiritganimiz yo‘q. Faqat loysuvoq qilib ta’mirlaganmiz, xolos”, — deydi Davlatnazar Rajabov.
“Ulli hovli” o‘z nomiga monand katta ekan. Salkam bir gektar maydonni egallagan. Bu yerda o‘n o‘rinli mehmonxona tashkil etilgan, o‘tovlar tikilgan. Bundan tashqari, hunarmandchilikning yettidan ortiq turi bilan shug‘ullanish uchun ustaxonalar tashkil etilgan. O‘zbek va turkman millatlari azaliy do‘stligining yorqin namunasi bo‘lgan ko‘rkam majmuaga bugun Fransiya, Polsha, AQSh, Eron, qo‘shni Turkmanistondan keladigan sayyohlarning qadami uzilmaydi. Mehmonlar bu yerda bir ariqdan suv ichib, ahil va inoq yashab kelgan azaliy do‘st o‘zbek-turkman xalqlarining turmush tarzi, urf-odatlari, milliy an’analari haqida yaxlit tasavvurga ega bo‘ladi.
Tadbir ishtirokchilari shu yerda tashkil etilgan Navro‘z bayrami, “Sumalak sayli” tantanalarini tomosha qildi. Hudud oshxonasiga xos bo‘lgan jizzali patir yopish, tuxum barak pishirish bo‘yicha mahorat darslari o‘tkazildi.
Izoh (0)