Bugun, 1-mart kuni O‘zbekiston mudofaa vazirining birinchi o‘rinbosari – Qurolli Kuchlar Bosh shtabi boshlig‘i general-mayor Pavel Ergashev Rossiya Federatsiyasi Markaziy harbiy okrugi qo‘shinlari qo‘mondoni general-palkovnik Aleksandr Lapin boshchiligidagi harbiy delegatsiyani qabul qildi. Bu haqda Mudofaa vazirligi matbuot xizmati xabar berdi.
Uchrashuv davomida tomonlar ikki davlat mudofaa idoralarining hamkorligi hamda uni rivojlantirish istiqbollari, harbiy-ta’lim yo‘nalishida o‘zaro manfaatli aloqalarni mustahkamlash muhokama qilindi.
O‘zbekiston Qurolli Kuchlari Bosh shtabi boshlig‘i Pavel Ergashev davlatlar rahbarlari hamda mudofaa vazirlari darajasida muntazam ravishda o‘tkazib kelinayotgan uchrashuvlar strategik hamkorlik va mamlakatlar o‘rtasida ittifoqdosh munosabatlarni mustahkamlashga, shuningdek, mintaqada xavfsizlikni ta’minlashga qo‘shimcha turtki bo‘lishini ta’kidladi.
General-mayor Pavel Ergashev Rossiya Markaziy harbiy okrugi qo‘shinlari qo‘mondoniga O‘zbekiston Mudofaa vazirligi qo‘shinlarining jangovar tayyorgarligini oshirish masalalarida ko‘rsatayotgan yordami uchun minnatdorchilik bildirdi.
2017-yilning oktabrida “Forish” tog‘ poligonida (Jizzax viloyati) ikki mamlakat o‘rtasida harbiy hamkorlik hamda Rossiya—O‘zbekiston qo‘shma harbiy mashg‘ulotlari ham yod etildi, unda Rossiya Markaziy harbiy okrugiga qarashli tog‘-o‘qchi bo‘linmalarini jalb etilgandi.
2016-yildan qayta tiklangan O‘zbekiston harbiy xizmatchilarini Rossiya muassasalarida o‘qitish amaliyoti ham naqadar ahamiyatli ekanligi ham qayd etib o‘tildi.
Aleksandr Lapin O‘zbekiston Rossiyaning strategik hamkori hamda Markaziy Osiyo mintaqasida xavfsizlikning kafolati ekanligini bildirdi.
Uchrashuvdan so‘ng, Rossiya Qurolli Kuchlari delgatsiyasi O‘zbekiston Qurolli Kuchlari akademiyasiga tashrif buyurib, oliy harbiy ta’lim muassasasasi tarixi va faoliyati, shuningdek, qo‘mondonlik va shtab bo‘g‘inida harbiy kadrlarni tayyorlash sohasida yangicha yondashuvlar bilan tanishdi.
Aleksandr Lapin Rossiya armiyasining Yaqin Sharqdagi jangovar harakatlari haqida ma’ruza o‘qib, Akademiya shaxsiy tarkibi bilan tajribalarini bo‘lishdi.
Ertaga, 2-mart kuni Rossiya Federatsiyasining harbiy delegatsiyasi Samarqand shahriga tashrif buyurib, shaharning tarixiy va madaniy obidalari bilan yaqindan tanishadi.
Izoh (0)