KXDR yetakchisi Kim Chen In Pxenyan temiryo‘l vokzalidan Xanoyga yo‘l oldi — u 27—28-fevral kunlari shu shaharda AQSh prezidenti Donald Tramp bilan uchrashadi.
“Mahalliy vaqt bilan soat ta’minan 17:00 (Toshkent vaqti bilan 13:00 da) Kim Chen In o‘zining zirhli poyezdida Xanoyga yo‘l oldi. KXDR yetakchisi Vyetnamgacha bo‘lgan butun yo‘lni Xitoy orqali temiryo‘lda bosib o‘tishi kutilmoqda”, — deya ma’lum qildi ismi oshkor etilmagan diplomatik manba.
Kim Chen In Vyetnamning Xanoy shahriga samolyotda emas, balki poyezdda borishi haqidagi xabarlar avval ham tarqalgan edi. KXDR poytaxtidan Vyetnamgacha bo‘lgan temiryo‘l uzunligi 4,5 ming kilometrdan ortiq. Og‘ir zirhli poyezd soatiga o‘rtacha 100 kilometr tezlik bilan harakatlansa, bu masofani ikki sutkada bosib o‘tishi mumkin. Donald Tramp bilan uchrashuv 27—28-fevral kunlari bo‘lib o‘tadi.
“Kommersant”ning yozishicha, Rossiya, Xitoy va Janubiy Koreya KXDRga nisbatan sanksiyalarning bir qismini bekor qilish to‘g‘risida BMT Xavfsizlik kengashiga qo‘shma taklif kiritishga tayyor. Ushbu taklif AQSH va Shimoliy Koreya sammiti yakuniga yetganidan so‘ng taqdim etilishi kutilmoqda. Bo‘lajak uchrashuv yakunlariga ko‘ra Vashington va Pxenyan o‘rtasida qarama-qarshilik tugatilgani haqida bayonot berilishi mumkin.
Izoh (0)