15-fevral kuni Stokgolm uyezd sudi Telia telekommunikatsiya kompaniyasi rahbariyatiga kirgan shaxslardan ayblovlarni olib tashladi, deb yozadi “Yle.fi”.
Ular orasida kompaniya sobiq bosh direktori Lars Nyuberg va sobiq direktor o‘rinbosari Tero Kivisaari ham bor, ular O‘zbekistonda biznes yuritish imkoniyatiga ega bo‘lish maqsadida Gulnora Karimovaga pora berganlikda gumon qilingan edi.
Mojaro bir necha yil avval, Telia 2004—2012-yillarda O‘zbekiston hukumatiga aloqasi bo‘lgan soxta kompaniya hisobiga 800 million dollarga yaqin mablag‘ o‘tkazgani ma’lum bo‘lgach, yuzaga kelgan edi. Niderlaniya va AQSh hukumatlari 2014-yildan Telia’ning 2007-yilda o‘zbek bozoriga kirib borishini tekshirishni boshladi, 2016-yilda esa kompaniyaga 1,25 milliard yevro jarima soldi.
2015-yilda kompaniya Yevrosiyo bozoridan chiqishga qaror qildi. 2017-yil sentabrida uch nafar sobiq rahbarlarga korrupsiya bo‘yicha ayblov e’lon qilindi, uchalasi ham o‘z aybini rad etdi.
Izoh (0)