«Ўзагротехсаноатхолдинг» АЖ таркибидаги тизим корхоналар томонидан замонавий электротракторлар ишлаб чиқариш лойиҳаси бўйича иш бошланди. Бу ҳақда «Ўзагротехсаноатхолдинг» АЖ матбуот хизмати «Дарё»га хабар берди.
Ушбу лойиҳани амалга оширишда «Ўзагротехсаноатхолдинг» АЖ Австриянинг дунёга машҳур AVL компанияси билан ҳамкорликни йўлга қўяди.
Бу ҳақда 12 февраль куни «Ўзагротехсаноатхолдинг» АЖ раҳбарияти ҳамда AVL компанияси вакиллари ўртасида бўлиб ўтган учрашувда маълум қилинди.
Шунингдек учрашувда «Ўзагротехсаноатхолдинг» АЖ таркибидаги тизим корхоналар томонидан ишлаб чиқарилаётган 100 от кучигача бўлган тракторларни тўлиқ электрлаштириш бўйича музокаралар олиб борилди. Унга кўра 2019 йил якунигача AVL компанияси янги электротракторларнинг консептуал лойиҳаларини тайёрлайди. Илк намуналар эса «Ўзагротехсаноатхолдинг» АЖ таркибидаги тизим корхоналар томонидан 2021 йилда ишлаб чиқарилади.
«Бундай замонавий трактор моделлари 180 киловаттли электродвигателларга эга бўлади ва деярли шовқин чиқармайди. Шу билан бирга уларни таъмирлаш жуда осон бўлади. Яна бир аҳамиятли жиҳати шундаки бундай замонавий электротракторлардан фойдаланиш фермерлар ва деҳқонларнинг ёқилғи ҳамда эҳтиёт қисмлари учун катта маблағ сарфлашларининг олдини олади» – дейди «Ўзагротехсаноатхолдинг» АЖ бошқаруви раиси Мухтор Каримов.
Изоҳ (0)